FIER– Një nga nyjet më të rëndësishme rrugore në qytetin e Fierit është kthyer në një burim të vazhdueshëm rreziku për këmbësorët. Ura mbi lumin Gjanicë, e cila ndodhet në rrugën nacionale që lidh Fierin me qytetin e Vlorës si dhe me veriun e vendit, paraqet një gjendje të degraduar.
E ndërtuar që në vitin 1978, kjo urë nuk ka parë asnjë ndërhyrje apo masë mirëmbajtjeje prej më shumë se 47 vitesh. Siç dallohet qartë në pamje, parmakët prej betoni janë tërësisht të shkatërruar, ndërsa trotuaret anësore janë me plasaritje të mëdha. Në të gjithë gjatësinë prej 40 metra të urës, hekurat lidhës të parmakëve kanë dalë jashtë betonit. Rreziku shtohet çdo ditë e më shumë, për shkak se mbi këtë ure kalojnë çdo ditë qindra mjete, edhe ato te tonazhit te rëndë.
Pavarësisht se kjo situatë e rrezikshme vazhdon prej vitesh, ARRSH-ja nuk ka ndërmarrë asnjë masë. Ajo që ngre më shumë shqetësim te banorët është fakti se, ndonëse projekti i investimit për sistemimin e lumit Gjanicë ka disa muaj që ka përfunduar, mirëmbajtja e kësaj ure kryesore është lënë jashtë investimit te Qeverisë.
Sipas kryetarit të Bashkisë, Armando Subashi, rehabilitimi i urës është pjesë e fazës së tretë të projektit të lumit Gjanica, i cili do të realizohet nga Fondi Shqiptar i Zhvillimit.
Në një fazë të dytë, bashkë me pjesën e mbetur të lumit Gjanica, do të nisë edhe riparimi i urës së ndërtuar mbi lumë.
