Ky pallat i ndërtuar në Tiranë u konfiskua në maj të këtij viti pasi u konstatuan 3 kate pa leje. Ndonëse punimet nuk kishin përfunduar plotësisht, disa prej apartamenteve kishin nisur të përdoreshin, ndërsa të tjera qytetarë që kishin po ashtu kontrata blerjeje, u shqetësuan për fatin e pasurisë së tyre.
Pikërisht për raste të tilla të ngjashme, një projektligj i propozuar nga qeveria, i jep fund ngërçit.
Ligji aktual parashikon njohjen proporcionalisht të shumës së paguar dhe kompensimin e personit të tretë me vlerën që korrespondon me punimet e realizuara. Ndërsa me ndryshimet e propozuara njihen dhe respektohen kontratat e lidhura përpara konstatimit të paligjshmërisë. Kur punimet në strukturë kanë përfunduar dhe njësitë posedohen nga qytetarë që kanë lidhur kontrata noteriale me investitorin, ato legalizohen. Pas përfundimit dhe regjistrimit të objektit, njësitë përkatëse mund t’u kalojnë këtyre personave. Në raste të caktuara, AAPSK-ja mund të ofrojë edhe kompensim financiar.
Për objektet e papërfunduara, ekspertë të licencuar do të përcaktojnë punimet dhe kostot e nevojshme. Dhe në përfundim të punimeve, për njësitë për të cilat ka patur kontrata sipërmarrjeje apo shitjeje, ndiqet e njëjta procedurë që u njeh atyre në fund, titullin e pronësisë.
Sipas projektligjit, Agjencia për Administrimin e Pasurive të Sekuestruara dhe të Konfiskuara do të marrë në dorëzim, regjistrojë dhe inventarizojë objektet e konfiskuara, ndërsa do të vendosë edhe për kalimin e tyre për strehim social, interes publik, dhënie me qira apo shitje me ankand. Komisioni i Objekteve të Konfiskuara dhe strukturat e mëparshme të zbatimit do të hiqen nga skema.
Ndryshimet parashikojnë krijimin e një fondi të posaçëm për ndërtimet pa leje. Ky fond do të financohet nga shitja dhe qiradhënia e objekteve të konfiskuara, financimet vendase ose të huaja dhe buxheti i shtetit. Paratë do të përdoren për përfundimin dhe përshtatjen e ndërtimeve, kompensimin e personave të tretë dhe mbulimin e kostove të administrimit.
Një tjetër pikë e rëndësishme është njohja e së drejtës së parablerjes për subjektet që vetëdeklarojnë pranë Agjencisë së Zhvillimit të Territorit objektet e ndërtuara pa leje, brenda gjashtë muajve nga hyrja në fuqi e ligjit.
Shitja e objekteve të konfiskuara do të bëhet me ankand publik dhe nuk do të lejohet një çmim më i ulët se vlera fillestare. Zhvilluesit dhe subjektet e tjera përgjegjëse për ndërtimin e konfiskuar përjashtohen nga pjesëmarrja në ankand.
