SARANDË– Policia nuk ka rënë ende në gjurmët e dy autorëve që ekzekutuan Artan Myrtajn në qendër të Sarandës, i njohur edhe si “Tani i Rruzhdiut”. Në kuadër të hetimeve, Policia e Tiranës, ajo e Vlorës dhe Forcat RENEA kanë ushtruar kontrolle që në orët e para të mëngjesit në zonën e Kamzës, ndërsa mbi 20 kontrolle janë kryer edhe në Sarandë.
Burime për gazetarin e Report Tv, Sokol Dema bëjnë me dije se në Kamëz është bastisur banesa e Ervis Lamajt, i cili nuk është gjetur në banesë. Lamaj përflitet si kreu i një grupi kriminal me bazë në Kamëz, i cili dyshohet se fshihet pas disa ngjarjeve kriminale zinxhir në Sarandë, që nisën pas plagosjes së dy të rinjve po nga Kamza për tokat në bregdet. Plagosje në të cilën një vit më parë ishte përfshirë edhe vetë “Tani i Rruzhdiut”
Myrtajt u qëllua sapo doli nga një lokal në qendër të Sarandës, pranë ish-agjencisë. Dy persona me skafandra, që lëviznin me motor, qëlluan me breshëri plumbash ndaj 44-vjeçarit. Sapo i pikasi, Myrtaj tentoi të largohej me vrap, por u godit nga plumbat dhe mbeti i vdekur në vend. Grupi hetimor ka gjetur 16 gëzhoja në vendngjarje, ndërsa sipas burimeve, dyshohet se autorët kanë përdorur dy armë të ndryshme.
Hetuesit ende nuk kanë të dhëna për drejtimin në të cilin janë larguar autorët. Deri më tani nuk janë gjetur as motori dhe as armët e përdorura në krim.
Nga të shtënat mbeti i plagosur edhe Xhevdet Skëndaj, 73 vjeç, i cili u godit nga një plumb në shpinë teksa po kalonte në rrugë. Ai ndodhet në Spitalin e Traumës, ku po merr ndihmë mjekësore.
Një nga pistat kryesore që po shqyrtojnë hetuesit lidhet me një ngjarje të vitit të kaluar në Sarandë. Artan Myrtaj kishte vetëm pak javë që ishte liruar nga burgu dhe ishte lënë në masën e sigurisë “detyrim paraqitjeje”. Ai ishte arrestuar në korrik të vitit 2025, nën dyshimin se ishte përfshirë në ngjarjen ku Ramadan Zoto plagosi dy të rinj nga Kamza, pas një konflikti për tokat në bregdet.
Plagosja e dy të rinjve u pasua nga një sërë ngjarjesh kriminale në Sarandë, shpërthimi me tritol i makinës së Klaus Jaçajt, vrasja e babait të tij, Isuf Jaçajt, dhe djegia e lokalit që Ramadan Zoto kishte dhënë me qira në Ksamil.
Atentati në Sarandë, Demo kërkon task-forcë dhe shkarkime! Në ‘shënjestër’ drejtuesit e komisariatit
Ministri i Brendshëm, Ervin Demo, në takimin e parë me drejtorët e policive të qarqeve në vend, një ditë pas atentatit të rëndë në Sarandë, ka kërkuar ngritjen e një task force në qytet, për hetimin e ngjarjeve të fundit kriminale në qytet. Burime pranë policisë i thanë Report Tv se ministri Demo ka qenë i ashpër me komisariatin, duke kërkuar edhe shkarkim të niveleve drejtuese atje.
Është e paqartë nëse kryepolici Skënder Hita do të ndërmarr në vijim një vendim për largimin nga detyra të shefit të komisariatit dhe shefave poshtë tij, vetëm për ngjarjen e vrasjes së Artan Myrtajt, në një kohë që gjatë muajve të verës në këtë qytet janë kryer disa operacione të suksesshme për rritjen e sigurisë dhe uljen e nivelit të krimit të organizuar. Pak javë më parë, një operacion me 20 masa sigurie për droge u përmbyll me arrestimin e plotë të tyre, përfshirë lënien në qeli të të gjithëve.
Ndërkohë, ministri Demo ka kërkuar nga të gjithë drejtorët e qarqeve në vend një analizë të plotë të punës, për të gjithë territorin, sidomos për sigurinë në shkolla.
