Një debat i nisur në rrjetin social TikTok rrezikoi të përfundonte në një përplasje mes dhjetëra të miturve në Yzberisht, por ndërhyrja e Policisë së Tiranës shmangu konfliktin para se grupet të përballeshin.
Sipas burimeve, gjithçka ka nisur mes dy të miturve, të cilët janë konfliktuar fillimisht në TikTok. Debati nuk mbeti vetëm mes tyre, por u përfshinë edhe shokët e secilit, duke krijuar dy grupe që nisën të sfidonin njëri-tjetrin në bisedat në rrjetet sociale.
Në komunikimet e tyre, të rinjtë shkëmbenin mesazhe provokuese si: “Ata janë më të fortë se ne në lagje” apo “nuk do i lëmë të na bëjnë të fortin”, ndërsa më pas kishin rënë dakord të takoheshin në Yzberisht për t’u sqaruar.
Informacioni për përplasjen e planifikuar ka mbërritur në rrugë operative te efektivët e Komisariatit të Policisë Nr. 6, të cilët kanë nisur menjëherë punën për identifikimin e të miturve dhe kanë shkuar në zonën ku ishte lënë takimi.
Në momentin e ndërhyrjes, policia ka konstatuar disa prej të miturve të pajisur me shkopinj bejsbolli, që dyshohet se do të përdoreshin gjatë konfliktit. Dy shkopinj bejsbolli janë sekuestruar, ndërsa të miturit janë shoqëruar në komisariat. Më pas janë identifikuar dhe shoqëruar edhe pjesëtarët e tjerë të grupeve që do të përfshiheshin në konflikt.
Në përfundim të veprimeve hetimore dhe procedurale, të kryera në prani të prindërve dhe psikologut, materialet iu referuan Prokurorisë, e cila nisi procedimin penal në gjendje të lirë për 23 të mitur, të moshës nga 13 deri në 17 vjeç.
Policia e Tiranës thekson se konfliktet mes të miturve po marrin shpesh zanafillë në rrjetet sociale dhe u bën thirrje prindërve, mësuesve dhe familjarëve të bashkëpunojnë me autoritetet për të parandaluar raste të ngjashme, të cilat mund të përshkallëzohen në ngjarje të rënda.
Njoftimi i plotë i Policisë
“Procedohen penalisht 23 shtetas të moshave 13-17 vjeç, që do të përfshiheshin në konflikt. Sekuestrohen 2 shkopinj bejsbolli. Menjëherë pas sigurimit të informacionit se dhjetëra të mitur do të konfliktoheshin në rrugën “Besim Alla”, shërbimet e Komisariatit të Policisë Nr. 6 kanë shkuar në zonën e sinjalizuar, për të parandaluar ngjarjen.
Read more:“Koka e gjarprit”/ Xhemalaj: Vlora Hyseni shiti informacione tek UDB-ja serbe, ky është akt tradhtie
Efektivët kanë konstatuar disa të mitur të pajisur me shkopinj bejsbolli, për t’i përdorur gjatë konfliktit. Ata janë shoqëruar në ambientet e Komisariatit dhe, në vijim, janë identifikuar dhe shoqëruar edhe të miturit e tjerë që do të përfshiheshin në këtë konflikt.
Në përfundim të veprimeve hetimore dhe procedurale, të kryera në prani të prindërve dhe psikologut, janë referuar materialet në Prokurori, ku ka nisur procedimi në gjendje të lirë për 23 të mitur. Gjithashtu, janë sekuestruar sendet e forta. Policia e Tiranës mbetet maksimalisht e angazhuar për të parandaluar konflikte ndërmjet të miturve dhe të rinjve, të cilat, ndonëse nisin për motive të dobëta, mund të përshkallëzojnë në ngjarje të rënda kriminale.
Për të përmbushur këtë objektiv prioritar, kërkojmë bashkëpunimin intensiv të prindërve, të afërmve, miqve dhe mësuesve të të miturve, të cilët konstatojnë në përditshmëri dhe në hapësirën dixhitale indicie për ngjarje të tilla ndërmjet bashkëmoshatarëve.
Siguria e fëmijëve dhe të rinjve, prioritet absolut i Policisë së Shtetit”
