Irani ka dënuar sulmet e fundit të SHBA-së ndaj objektivave ushtarake iraniane, duke i cilësuar ato si një “shkelje të qartë” të sovranitetit kombëtar.
Në një deklaratë, Ministria e Jashtme iraniane paralajmëroi se çdo vend i Lindjes së Mesme që strehon forca amerikane mund të bëhet objektiv nëse sulmet ndaj Iranit përsëriten.
Sipas Teheranit, forcat iraniane kanë shkaktuar dëme të konsiderueshme në bazat dhe asetet amerikane në rajon që, sipas tyre, u përdorën për të kryer sulmet ndaj Iranit. “Irani nuk do të hezitojë të shënjestrojë burimin e sulmeve”, thuhet në deklaratë.
Read more:Lufta drejt fundit/ Irani pranon të hapë Ngushticën e Hormuzit, gati marrëveshja me SHBA-në
Tensionet u përshkallëzuan pasi SHBA goditi objektiva iraniane pranë Ngushticës së Hormuzit, në përgjigje të rrëzimit të një helikopteri ushtarak Apache. Më pas, Irani njoftoi se kishte ndërmarrë sulme ndaj objektivave në Bahrein, Kuvajt dhe Jordani.
Deri më tani nuk ka konfirmim zyrtar për dëme në instalacionet amerikane në rajon, ndërsa sistemet e mbrojtjes ajrore u aktivizuan në të tre vendet.
Ndërkohë, ministri i Jashtëm iranian, Abbas Araghchi, zhvilloi biseda telefonike me homologët e tij në Arabinë Saudite dhe Turqi për situatën e sigurisë pas sulmeve amerikane.
