Kompjuterët e sekuestruar në biznesin e Armand Shakajt kanë zbuluar të dhëna që lidhen me llogari të kriptomonedhave, duke forcuar dyshimet e hetuesve se vrasja e Eglant Koçit ka ndodhur për motive financiare të lidhura me këtë aktivitet.
Burime bëjnë me dije se pajisjet elektronike janë zbërthyer në Laboratorin Kriminalistik, ku janë gjetur prova që pritet të kenë peshë në ecurinë e hetimeve. Bazuar në këto gjetje, pritet që akuza ndaj Shakajt të ndryshojë, nga “vrasje me dashje” që është duke u hetuar momentalisht.
Armand Shakaj vijon të jetë në kërkim, ndërsa akuzohet se vrau shokun e tij, Eglant Koçi, dhe më pas hodhi trupin e pajetë në një humnerë në një zonë të thellë të Elbasanit.
Gjurmimi i Armand Shakajt ka qenë i vështirë deri tani, pasi ka ndërruar disa numra celulari për të humbur gjurmë. Rezulton brenda vendit, por mundësia të jetë larguar ilegalisht nuk përjashtohet. Policia ka 2 pista për ngjarjen, për kriptomonedhat dhe paratë me fajde, të cilat janë akoma të paplota.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.
