Ai është një nga zërat më të fortë kundër emigrantëve në Britani, shpesh me gjuhë të ashpër edhe ndaj shqiptarëve. Por sot, Nigel Farage po përballet me një histori që hedh shumë pikëpyetje mbi integritetin e tij politik.
Siç raporton “The Guardian” Nigel Farage ka marrë 5 milionë paund nga miliarderi i kriptomonedhave Christopher Harborne, pak përpara se të shpallte se do të kandidonte në zgjedhjet e përgjithshme britanike të vitit 2024. Para kësaj, Farage kishte deklaruar publikisht se nuk kishte ndërmend të kandidonte për deputet. Ai u kishte dhënë fund spekulimeve duke thënë se do të ndihmonte vetëm në fushatë, por “nuk ishte momenti i duhur” për të hyrë vetë në garë. Por brenda pak javësh nga marrja e kësaj dhurate personale, ai bëri kthesë. Më 3 qershor 2024, shpalli kandidaturën për zonën e Clacton-on-Sea, duke ndryshuar plotësisht qëndrimin e mëparshëm. Në korrik të po atij viti, Farage u zgjodh deputet për herë të parë dhe më pas ka deklaruar se synon të bëhet kryeministër në zgjedhjet e ardhshme.
Read more (Zgjedhjet):Kosova drejt zgjedhjeve të parakohshme, Baraliu tregon datat
Fillimisht, as Farage dhe as Harborne nuk komentuan për këtë pagesë, edhe pse u kontaktuan nga media. Në vend të një përgjigjeje direkte, avokatët e tyre kërkuan më shumë kohë për reagim. Më pas, Farage e konfirmoi vetë për “The Telegraph” se e kishte marrë shumën, duke thënë se paratë ishin për sigurinë e tij personale. Deri në atë moment, kjo dhuratë prej 5 milionë paundësh nuk ishte bërë publike. Ajo nuk kishte detyrim të deklarohej, pasi Farage nuk ishte deputet në kohën kur e mori. Po ashtu, në momentin e marrjes së parave, ai nuk kishte shpallur ende kandidaturën për zgjedhjet, çka mund të ketë shmangur edhe detyrimin për deklarim pranë autoriteteve zgjedhore.
Read more (Reagim):PDK paralajmëron masa nëse LVV procedon zgjedhjen e presidentit në mënyrë antikushtetuese
Christopher Harborne është një figurë kyçe në financimin e politikës britanike dhe ka mbështetur prej vitesh Farage-in dhe partitë e tij. Vetëm një vit më parë, ai dhuroi 9 milionë paund për partinë Reform UK – donacioni më i madh i vetëm nga një person i gjallë për një parti politike në Britani. Në total, gjatë vitit 2025, kontributet e tij për këtë parti arritën në 12 milionë paund. Kjo shumë prej 5 milionë paundësh për Farage pritet të ngrejë pikëpyetje të reja, sidomos në lidhje me deklaratat e tij para zgjedhjeve dhe marrëdhënien që ka me Harborne. Vetë Farage ka deklaruar se komunikon me biznesmenin “ndoshta një herë në muaj ose çdo gjashtë javë” dhe ka këmbëngulur se nuk i ka premtuar asgjë në këmbim të parave.
