TIRANË– Sali Berisha zhvilloi këtë të martë një takim me banorët e Astirit, ku vijoi me akuza të forta ndaj kryeministrit Edi Rama. Ai akuzoi qeverinë për kapje të institucioneve dhe bashkëpunim me elementë kriminalë, ndërsa deklaroi se qytetarët e Astirit janë simbol i rezistencës dhe frymëzim për të gjithë shqiptarët.
“E shtroi qeverisjen në bashkëpunimin më të ngushtë me bandat më vrastare dhe kartelet e drogës. Shkatërroi procesin zgjedhor dhe i ktheu zgjedhjet në një farsë elektorale. Nuk kanë plaçkitur të gjitha regjimet sa ka plaçkitur kjo qeveri”,- tha Berisha.
Berisha deklaroi se opozita ka arritur rezultate duke e çuar betejën në një pikë vendimtare.
“Arritëm në kilometrin e fundit pasi kemi plagosur bishën për vdekje”,- tha Berisha.
Ai theksoi se kryeministri është damkosur ndërkombëtarisht për mënyrën e qeverisjes. Sipas tij, raportet ndërkombëtare konfirmojnë akuzat e opozitës ndaj qeverisë.
Në fund, Berisha bëri thirrje për mobilizim qytetar në protestë.
“Më 8 maj të ngrihemi madhërishëm në protestë për dinjitetin dhe të ardhmen e Shqipërisë”,- tha Berisha.
