Ekspozimi ndaj diellit nuk lidhet vetëm me mungesën e kremit mbrojtës. Faktorë të përditshëm, që shpesh kalojnë pa u vënë re, mund ta bëjnë lëkurën më të ndjeshme dhe më të rrezikuar ndaj dëmtimeve.
Një prej tyre janë produktet që përdoren për kujdesin e lëkurës. Disa kremra kundër plakjes apo trajtime për aknet ndikojnë në shtresën mbrojtëse të lëkurës dhe e bëjnë atë më të ndjeshme ndaj rrezeve UV.
Përbërës si retinoli, vitamina A, acidi glikolik, acidi salicilik apo hidrokinoni mund të rrisin ndjeshmërinë ndaj diellit.
Read more:Ndjenja se jeni të rëndësishëm për të tjerët mund të jetë çelësi i një jete më të qëndrueshme
Edhe disa ilaçe mund të kenë të njëjtin efekt. Trajtimet për aknet, por edhe disa antibiotikë, ilaçe kundër depresionit apo anti-inflamatorë mund ta bëjnë lëkurën më të prirur ndaj djegieve nga dielli.
Ndikim ka edhe mënyra e të ushqyerit. Mungesa e vitaminës B3 lidhet me rritjen e ndjeshmërisë ndaj diellit. Nga ana tjetër, disa ushqime si selino, majdanoz apo agrume të caktuara mund të shkaktojnë reagime në lëkurë kur ekspozohen ndaj rrezeve.
Një tjetër gabim i zakonshëm është neglizhimi i mbrojtjes në ditët me re. Edhe kur moti duket i freskët, një pjesë e madhe e rrezeve UV depërton përmes reve dhe mund të dëmtojë lëkurën.
Për këtë arsye, kujdesi ndaj diellit duhet të jetë i përditshëm. Aplikimi i kremit me SPF, shmangia e orëve të pikut dhe vëmendja ndaj produkteve apo ilaçeve që përdoren janë hapa të thjeshtë që ndihmojnë në mbrojtjen e lëkurës.
