Të ardhurat nga qiradhënia e pasurive të sekuestruara rriten me 39%, AAPSK: Fondet po mbështesin drejtësinë

Të ardhurat nga qiradhënia e pasurive të sekuestruara dhe të konfiskuara janë rritur me 39% gjatë vitit 2025, duke arritur në 221 milionë lekë, nga 159 milionë lekë që ishin një vit më parë.

Shifrat u bënë publike nga Agjencia e Administrimit të Pasurive të Sekuestruara dhe të Konfiskuara (AAPSK), gjatë Simpoziumit Kombëtar “Nga Konfiskimi te Interesi Publik: Sfidat dhe Perspektivat e Administrimit të Aseteve të Konfiskuara”, ku morën pjesë përfaqësues të sistemit të drejtësisë, institucioneve ligjzbatuese dhe partnerëve ndërkombëtarë.

Sipas AAPSK, një pjesë e konsiderueshme e të ardhurave të krijuara nga administrimi i këtyre pasurive është përdorur për të mbështetur institucionet e drejtësisë dhe sigurisë, duke e kthyer konfiskimin e aseteve në një burim financimi për vetë shtetin.

Read more:Strehimi po bëhet ‘luks’ qiratë dhe çmimet e shitjes së apartamenteve në qiell! Ekspertët: Ka kërkesë të lartë, po ndikon turizmi por edhe kostot e rritura të ndërtimit

Përfaqësuesit e agjencisë theksuan se procesi nuk përfundon me vendimin e gjykatës për konfiskimin e një pasurie, por vijon me administrimin e saj, me synimin për të ruajtur vlerën ekonomike, për të mbrojtur interesin publik dhe për të mos lejuar rikthimin e përfitimeve të aktivitetit kriminal te autorët.

AAPSK bëri të ditur se një tjetër objektiv është përdorimi social i pasurive të konfiskuara. Sipas agjencisë, këto asete synohet të shndërrohen në qendra komunitare, institucione sociale, hapësira edukimi dhe shërbime publike, në përputhje me praktikat evropiane.

Read more:Nga statistikat te veprimi, si po luftohen sëmundjet kronike jo-ngjitëse në Kosovë?

Në të njëjtën kohë, agjencia pranoi se administrimi i pasurive të sekuestruara shoqërohet me sfida, si mirëmbajtja e tyre, administrimi i bizneseve që vazhdojnë aktivitetin, vlerësimi profesional i aseteve dhe nevoja për ekspertizë të specializuar.

Gjatë aktivitetit u theksua gjithashtu rëndësia e bashkëpunimit mes institucioneve ligjzbatuese, SPAK-ut, gjykatave, Zyrës së Rikuperimit të Aseteve dhe institucioneve financiare, ndërsa AAPSK njoftoi se ka zgjeruar bashkëpunimin me partnerë ndërkombëtarë dhe institucione homologe në Itali, Francë, Mbretërinë e Bashkuar dhe Kosovë si edhe me organizata si GIZ, UNODC dhe UNICEF, me synimin për të ndërtuar modele moderne administrimi dhe për të rritur profesionalizmin institucional.