Korça është kthyer edhe këtë vit në qendrën e muzikës frymore, duke mirëpritur edicionin e dytë të Festivalit Ndërkombëtar të Bandave, një aktivitet që synon të shndërrohet në një traditë të rëndësishme kulturore për qytetin dhe gjithë vendin.
Rreth 200 artistë nga Shqipëria, Kosova, Maqedonia e Veriut, Mali i Zi dhe Italia janë bërë pjesë e festivalit, i cili përfshin parada artistike, koncerte në hapësirat publike të qytetit, si dhe ëorkshop-e për të rinjtë dhe të apasionuarit pas instrumenteve të frymës.
Organizatori i festivalit, Ilir Kodhima, u shpreh se ky aktivitet ka si synim jo vetëm të sjellë në Korçë banda me traditë nga vende të ndryshme, por edhe të krijojë ura bashkëpunimi mes artistëve dhe të promovojë muzikën frymore tek brezat e rinj. Sipas tij, në festival marrin pjesë Banda e Qytetit të Korçës, Orkestra Frymore e Forcave të Armatosura të Shqipërisë, si dhe banda italiane me mbi 200 vite histori.
Read more:Lezhë/ Abuzimi me çmimet në plazhe, vijojnë kontrollet nga bashkia! Pushuesit: Kemi paguar 10 euro
Drejtoresha e Artit dhe Kulturës, Blerta Belliu, tha se festivali nisi vitin e kaluar si një eksperiment i suksesshëm dhe tashmë po kthehet në një traditë. Ajo theksoi se ky është i vetmi festival i bandave në Shqipëri dhe se, përveç promovimit të turizmit kulturor, ai synon të nxisë interesin e të rinjve për instrumentet e frymës, të cilat, sipas saj, janë drejt zhdukjes në Korçë dhe në vend.
Pjesëmarrësit e huaj vlerësuan organizimin dhe mikpritjen korçare. Dirigjenti i orkestrës nga Kotori i Malit të Zi, Dario Krivokapiç, u shpreh se kjo është hera e parë që ansambli i tij performon në Shqipëri, duke e cilësuar organizimin si të shkëlqyer. Ai bëri të ditur se orkestra, e themeluar në vitin 1842, do të interpretojë marshime, muzikë klasike, kolona zanore filmash dhe vepra të njohura.
Edhe drejtuesi i bandës italiane, Giuseppe Buccucci, shprehu vlerësimin për atmosferën dhe mikpritjen në Korçë. Ai tha se banda që përfaqëson ka rreth 200 vite histori dhe merr pjesë rregullisht në festivale ndërkombëtare, duke e konsideruar pjesëmarrjen në Korçë një eksperiencë të veçantë.
Ndërkohë, dirigjenti i Orkestrës Frymore të Forcave të Armatosura të Shqipërisë, major Altin Babameto, vlerësoi rolin historik të Korçës në zhvillimin e muzikës frymore shqiptare. Ai kujtoi se Korça është vendlindja e orkestrës së parë zyrtare të shtetit shqiptar dhe e cilësoi festivalin si një nismë me vlera të mëdha artistike dhe edukative, që meriton të zhvillohet çdo vit.
Festivali Ndërkombëtar i Bandave vijon me parada dhe koncerte në zonën këmbësore dhe në Pazarin e Vjetër, duke sjellë një atmosferë festive për qytetarët dhe vizitorët e Korçës, ndërsa synon të forcojë traditën e muzikës frymore dhe bashkëpunimin kulturor mes vendeve pjesëmarrëse.
lajm në përditësim…
