Në Gjykatën e Posaçme ka dëshmuar Xhuliano Xhaferraj, vëllai i Fridman Xhaferrajt, për vrasjen e të cilit akuzohet edhe Laert Haxhiu. Ai tregoi se në kohën kur u vra i vëllai ndodhej në burg dhe lajmin e mori vetëm pasi u lirua.
“Kur më kanë vrarë vëllain kam qenë në burg. Kur jam liruar kishte tre ditë që ishte vrarë. E kishin identifikuar viktimën, por nuk ishin të sigurt. Më morën në pyetje, verifikuan që isha në burg dhe pas disa orësh mësova se ishte vëllai im”, dëshmoi ai.
Xhaferraj tha se pas lirimit shkoi në banesë, ku gjeti policinë duke kryer kontroll, ndërsa më pas u shoqërua në komisariat. Sipas tij, Fridmani i kishte thënë rreth 20 ditë para vrasjes se do të shkonte në Itali, por nuk i kishte treguar më shumë për lëvizjet e tij.
Dëshmitari rrëfeu edhe lëvizjet e vëllait tjetër të familjes, Aleksandrit, duke thënë se ai kishte qenë në Greqi dhe ishte ndihmuar nga disa persona për t’u larguar.
I pyetur për autorët e vrasjes së Fridman Xhaferrajt, Xhuliano deklaroi se nuk e di kush e ka kryer krimin.
“Nuk e di kush e vrau Fridmanin. Babai i Laertit, Qamili, më tha se djali i tij nuk kishte dorë dhe nuk kishte asnjë lidhje me ngjarjen. Jemi takuar rreth një muaj pas vrasjes, pasi kemi tokat afër. E pyeta për çfarë flitej, që Laerti kishte dhënë urdhër për vrasjen, por ai më tha se djali i tij nuk kishte lidhje. Unë nuk kam qenë fare i përfshirë. Kur flisja me vëllain, ai më thoshte të shihja hallet e mia dhe familjen time”, u shpreh dëshmitari.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
Lajmi në përditësim…
Gjyqi ndaj Laert Haxhiut, dëshmon vëllai i Albi Bashaliut: Nuk e di kush e vrau, lajmin e mora nga televizioni
Në Gjykatën e Posaçme ka dëshmuar Leonard Bashaliu, vëllai i Albi Bashaliut, në procesin gjyqësor ndaj Laert Haxhiut. Bashaliu u transportua nga burgu i Peqinit, ku po vuan dënimin për vrasjen e Ylber Xhahysës.
Në dëshminë e tij, ai tha se në momentin e vrasjes së të vëllait ndodhej në burgun e Elbasanit dhe lajmin e kishte mësuar nga televizioni.
“Vëllai im është vrarë më 27 dhjetor 2021. Unë kam qenë në burg, në IEVP Elbasan, kur ndodhi vrasja. E mora vesh nga televizioni që ishte vrarë Albi. Nuk kam qenë mirë nga ana psikologjike dhe nuk kërkova takim me askënd. Më erdhi të më takonte mamaja, por nuk folëm për ngjarjen”, deklaroi ai.
Leonard Bashaliu konfirmoi gjithashtu se është autor i vrasjes së Ylber Xhahysës, krim për të cilin po vuan dënimin.
“Unë e kam vrarë Ylber Xhahysën. E kam pranuar krimin, kam shprehur pendesë dhe kam marrë dënimin”, u shpreh ai.
I pyetur për vrasjen e të vëllait, Bashaliu tha se nuk ka dijeni se kush mund ta ketë kryer krimin.
“Nuk kam ide se kush mund ta ketë vrarë vëllain tim. Nuk më ka ardhur asnjë sinjal se kush mund ta ketë vrarë”, deklaroi ai para trupit gjykues.
Para trupit gjykues dëshmoi edhe kushëriri i viktimës, Sami Bashaliu, i cili rrëfeu momentet e atentatit.
Sipas tij, ngjarja ndodhi pranë lokalit të tij në fshatin Gjocaj të Peqinit.
“Ishte një makinë Audi e bardhë me xhama të errët dhe targa shqiptare. Gruaja më tha se makina kishte kohë që rrinte aty. U afrova, por nuk pashë njeri. Pas pak një person zbriti, iu afrua Albi Bashaliut dhe më pas u dëgjuan të shtënat. Personi ishte me maskë. Qëlloi dy ose tre herë. Djemtë që ishin ulur në lokal u trembën dhe u larguan. Në makinë ishin dy persona, por vetëm njëri qëlloi. Albi ra në tokë, ndërsa autorët më pas dogjën automjetin e viktimës”, dëshmoi ai.
Sami Bashaliu tha se nuk e njihte autorin dhe nuk kishte dijeni për konfliktet e viktimës.
“Albi nuk vinte më shpesh te lokali ynë që kur iu vra vëllai. Nuk dija gjë për të kaluarën e tij. Për Albert Xhahysën u mor vesh në zonë se kishte vrarë vëllanë e Albit, por unë nuk di gjë”, deklaroi dëshmitari.
