Një zjarr përfshiu një magazinë me lodra fëmijësh e fishekzjarrë pasditen e së enjtes, pranë mbikalimit të Shkozetit në Durrës.
Paraprakisht dyshohet se shkak i zjarrit janë bërë 3 kabllo të tensionit të lartë që pasi janë këputur si pasojë e temperaturave të larta, kanë rënë mbi magazinë.
Vatra ku nisën flakët është lokalizuar dhe nuk ka rrezik për objektet përreth. Për efekt sigurie, është stakuar energjia elektrike në një pjesë të qytetit.
Në operacion u angazhuan efektivë të shumtë zjarrfikës dhe forca të Mbrojtjes nga Zjarri dhe Shpëtimi të Durrësit, si edhe ekipet zjarrfikëse të Portit të Durrësit.
Read more:Zjarr në një magazinë në Shkozet, tym i madh në zonë
Gjatë operacionit, dy zjarrfikës u transportuan në spital për shkak të asfiksimit ku po marrin ndihmën e nevojshme mjekësore. Gjendja e tyre paraqitet e qëndrueshme.
Për shkak të zjarrit u bllokua qarkullimi i automjeteve në disa segmente.
Situatë e rënduar nga zjarri në Shkozet, Karakaçi: Ende e stakuar njëra prej linjave elektrike, është rikthyer energjia në një pjesë të Durrësit
Puna për shuarjen e flakëve në magazinën në Shkozet vijon ende për shkak të situatës së rënduar. Në një njoftim në rrjetet sociale, ministri Enea Karakaçi thotë se vijon të mbetet e stakuar njëra prej linjave 110 kV. Operatorët do të ndërhyjnë menjëherë për të kryer riparimet sapo situata të normalizohet. Ndërkohë furnizimi me energji është rikthyer pjesërisht në Durrës.
Read more:Me rritjen e çmimeve të karburantit, edhe Cozy Coupe "vjen me karikues elektrik"
“Situata e krijuar nga zjarri i rënë në një objekt privat (magazinë) në afërsi të rrjetit 110 kV në Shkozet vijon të jetë e rënduar. Shërbimi zjarrfikës po vazhdon punën për shuarjen e plotë të vatrës së zjarrit, ndërsa njëra nga linjat 110 kV mbahet e stakuar si masë sigurie, me kërkesë të zjarrfikësve.
Në orën 15:40, si pasojë e zjarrit, u stakuan linjat 110 kV që furnizojnë nënstacionin e Shkozetit, duke shkaktuar ndërprerje të energjisë elektrike në qytetin e Durrësit.
Brigadat e OST sh.a. ndodhen në terren dhe do të ndërhyjnë për riparimin e defektit dhe dëmeve të shkaktuara në linjën 110 kV menjëherë pas shuarjes së plotë të zjarrit. Nga ana e OSSH janë marrë masa të menjëhershme për furnizimin e një pjese të zonave përmes linjave alternative (unazë). Furnizimi me energji është rikthyer pjesërisht në Durrës dhe po punohet për normalizimin e plotë të situatës.
Read more:Emocionet e një proteste
Megjithatë, situata mbetet e vështirë, pasi furnizimi përmes unazimeve nuk mund të vazhdojë për një kohë të gjatë për shkak të ngarkesës së lartë në rrjet. Rivënia në punë e linjave 110 kV do të bëhet sapo të jetë shuar plotësisht zjarri dhe të krijohen kushtet e nevojshme për ndërhyrjen e sigurt të ekipeve në terren.
Ministria e Infrastrukturës dhe Energjisë kërkon mirëkuptimin e qytetarëve për situatën e krijuar dhe siguron se strukturat e OST dhe OSSH janë në gatishmëri të plotë për të rikthyer sa më parë energjinë në të gjithë zonën e prekur”, shkruan ministri.
Zjarri në Shkozet bllokon qarkullimin, policia apel qytetarëve: Ja akset që duhet të shmangni, përdorni rrugë alternative
Policia e Shtetit u ka bërë apel qytetarëve dhe drejtuesve të mjeteve të shmangin lëvizjen në këto akse rrugore dhe të përdorin rrugë alternative, deri në normalizimin e situatës.
“Për shkak të zjarrit të rënë në zonën e Shkozetit, është bllokuar qarkullimi i automjeteve në Unazën e qytetit, në mbikalimin e Shkozetit, në segmentin rrugor “Martin Camaj”, në drejtim të Plepave, si dhe në segmentin rrugor Kavajë-Durrës”, njofton policia.
Policia, zjarrfikëset dhe strukturat e tjera po punojnë për menaxhimin e situatës, shuarjen e zjarrit, garantimin e sigurisë dhe rikthimin e qarkullimit sa më shpejt të jetë e mundur.
