Pamje reale nga një zjarr i ndodhur më 11 gusht në Ujë të Ftohtë të Vlorës po qarkullojnë gjerësisht në rrjetet sociale me një histori krejt tjetër nga ajo që dokumenton videoja, duke u përdorur për të përhapur pretendime të paverifikuara kundër izraelitëve.
Në postimet që po shpërndahen pretendohet se një grup izraelitësh ishte dëbuar nga një Airbnb në Shqipëri pasi kishte shkatërruar apartamentin dhe se pronari kishte zbuluar më pas se ata ishin ushtarë të IDF-së.
Historia vazhdon me pretendimin se një ditë më vonë “i gjithë pallati u përfshi nga flakët” si pasojë e një zjarri të qëllimshëm, duke lënë të nënkuptohet se bëhej fjalë për një akt hakmarrjeje.
Por pamjet që shoqërojnë këtë histori janë nga një ngjarje tjetër dhe e dokumentuar në mediat shqiptare.
Videoja është realizuar më 11 gusht në zonën e Ujit të Ftohtë, pranë tunelit në Vlorë, kur një zjarr përfshiu një kabinë të ujësjellësit. Sipas informacioneve të publikuara atë ditë, dyshohej se flakët kishin nisur në pjesën kodrinore dhe më pas ishin përhapur në drejtim të objektit.
Një element tjetër domethënës është origjina e pretendimit që më pas është riprodhuar nga një mori profilesh të tjera.
Videoja duket se është shpërndarë fillimisht nga llogaria në X “Parody Jeff”. Vetë profili deklaron qartësisht në përshkrimin e tij se është një llogari “opinionesh dhe satire” dhe se përmbajtja e publikuar prej tij është “opinion, koment fiktiv dhe vetëm satirë”.
Megjithatë, një vështrim i postimeve të profilit tregon se një pjesë e konsiderueshme e përmbajtjes së tij të fundit lidhet me Izraelin dhe konfliktin izraelito-palestinez, shpesh me një qasje dukshëm anti-izraelite.
Problemi lind kur përmbajtje të tilla dalin nga konteksti satirik i profilit dhe shpërndahen nga përdorues të tjerë si të ishin raportime të vërteta.
Pikërisht kjo duket se ka ndodhur edhe me videon nga Vlora. I njëjti pretendim është riprodhuar nga një bloger italian në Instagram dhe një numër profilesh të tjera në disa gjuhë, përfshi anglisht, arabisht, japonisht dhe greqisht.
Rasti tregon se si një ngjarje reale, e dokumentuar me video nga mediat në Shqipëri, mund të shkëputet nga konteksti dhe të përdoret për të ndërtuar një narrativë krejt tjetër në rrjetet sociale.
Në këtë rast, pamjet reale të zjarrit në Ujë të Ftohtë janë shoqëruar me një histori të pambështetur në prova, duke krijuar përshtypjen e një “hakmarrjeje” të ushtarëve izraelitë në Shqipëri./TemA
