Tre mjekë në maternitetin e Pogradecit janë nën hetim për vdekjen e 36-vjeçares shtatzënë që ndërroi jetë gjatë transportit për në Tiranë.
Nën hetim janë dy kirurgë dhe një reanimator, për të cilët ka dyshime për neglizhencë në trajtimin e Marjana Bunajt.
Gruaja, e cila ishte në muajin e shtatë të shtatzënisë, është paraqitur në spital me kriza të forta në bark dhe pasi është ekzaminuar prej tre mjekëve, fillimisht është futur në reanimacion, i është dhënë gjak dhe pas një vlerësimit të gjendjes, është nisur për në Tiranë.
Rrugës, gjendja e saj u përkeqësua më tej. Ajo u dërgua menjëherë në maternitetin e Elbasanit, por humbi jetën në ambulancë.
Motra e së ndjerës që priste të bëhej nënë për herë të parë, bëri kallëzimin në polici pasi u shpreh se nëse reagimi i bluzave të bardha do të ishte më i shpejtë, motra e saj do të kishte shpëtuar. Ajo ka kërkuar zbardhjen e së vërtetës nëse motra e saj humbi jetën për shkak të pakujdesisë.
Për rastin reagoi edhe Ministria e Shëndetësisë dhe njoftoi se ka kërkuar një vlerësim të plotë dhe të pavarur të mënyrës si është trajtuar pacientja, duke përfshirë çdo hap nga paraqitja e saj në spital deri në përfundimin e trajtimit.
Trupi i 36-vjeçares, e cila ishte nga Mirdita, por e martuar në Pogradec, ndodhet në morgun e spitalit të Tiranës.
Njoftimi i policisë:
Specialistët për Hetimin e Krimeve të Komisariatit të Policisë Pogradec referuan materialet në Prokurori ku nisi procedimi penal për shtetasit: B. D., 35 vjeçe, banues në Elbasan, A. T., 40 vjeç, dhe S. Ç., 34 vjeç, të dy banues në Pogradec, me detyrë mjekë në maternitetin e Pogradecit.
Mbrëmjen e datës 30.08.2026, është paraqitur në maternitetin e Pogradecit, në gjendje jo të mirë shëndetësore, shtetasja M. K., 36 vjeçe, 7 muajshe shtatzënë. Pas ekzaminimit nga këta tre mjekë, 36-vjeçarja është nisur me autoambulancë, për ndihmë mjekësore të specializuar në një maternitet në Tiranë, por duke qenë se gjendja e saj shëndetësore është përkeqësuar gjatë rrugës, ajo është dërguar në maternitetin e spitalit të Elbasanit, ku u konstatua se kishte humbur jetën.
Read more:Tiranë/ Plagosi me thikë administratorin e pallatit ku banonte, arrestohet 35-vjeçari (EMRI+VIDEO)
Materialet procedurale iu referuan Prokurorisë së Korçës, për veprime të mëtejshme, për veprën penale “Neglizhenca në trajtimin mjekësor”.
Lajm në përditësim…
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
