Shërbimi i hemodinamikës në Spitalin Universitar “Shefqet Ndroqi” është zgjeruar me një investim të ri, që ka dyfishuar kapacitetet e tij. Pas rikonstruksionit të plotë të ambienteve, shërbimi tashmë funksionon me dy salla moderne, njëra prej të cilave është e pajisur me aparat të ri angiografie.
Sipas Ministrisë së Shëndetësisë, dy sallat janë në funksion që prej korrikut 2026, duke rritur numrin e ndërhyrjeve nga rreth 10 pacientë në ditë në rreth 16, me mundësi për ta shtuar edhe më tej këtë kapacitet.
Drejtoresha e spitalit, Elisaveta Treska, bëri të ditur se investimi krijon kushte më të mira për trajtimin e pacientëve, ndërsa mjekët theksojnë se prania e dy sallave mundëson vijimin e ndërhyrjeve edhe kur njëra është e zënë, veçanërisht në rastet me sindromë koronare akute.
Sipas Ministrisë së Shëndetësisë, rikonstruksioni i plotë i ambienteve dhe investimi në teknologji synojnë ofrimin e një shërbimi më të shpejtë, më të organizuar dhe me standarde bashkëkohore, duke ulur kohën e pritjes dhe duke u dhënë më shumë pacientëve mundësinë për të marrë trajtimin e nevojshëm në kohë.
Me dy sallat funksionale të hemodinamikës, Spitali Universitar “Shefqet Ndroqi” synon të rrisë ndjeshëm numrin e ndërhyrjeve koronare dhe të përmirësojë më tej cilësinë e shërbimit të ofruar për pacientët.
