FIER– Pas përballjes me flakët, në 3 njësi administrative të Fierit; Levan, Qendër dhe Frakull ka nisur puna e ekipeve të terrenit për konstatimin e dëmeve në bujqësi, blegtori dhe banesa. Komisionet përbëhen nga 5 anëtarë, si specialisti i emergjencave civile, kryetari i njësisë administrative, topografi, agronomi si dhe kryeplaku i fshatit.
“Verifikimi i dëmeve po kryhet mbi bazën e VKM-së 329 dhe zhvillohet në dy etapa: konstatimi fizik në terren dhe vlerësimi ligjor. Për dëmet në bujqësi, metodologjia bazohet në plotësimin e një formulari vetëdeklarimi, ku fermerët shënojnë numrin e rrënjëve të dëmtuara në ullishte, pemtari apo vreshtari”, tha nënkryetari i bashkisë Fier, Nusret Avdullai.
Deri më tani, verifikimi i objekteve ka përfunduar, ku numërohen 15 struktura të dëmtuara.
“Verifikimet treguan se asnjë prej tyre nuk ishte shtepi e banueshme apo e pajisur me elektroshtëpiake, por stalla, depo dhe magazina”, tha numri dy i bashkise.
Pas plotësimit të formularëve nga fermerët dhe konstatimit nga grupet e punës, dokumentacioni i kalon Këshillit Bashkiak dhe më pas Komisionit të Këshillit të Qarkut për marrjen e vendimeve mbi dëmshpërblimin.
Megjithatë, stafi i terrenit përballet me vështirësi të shumta administrative. Mungesa e dokumentacionit të rregullt, kontratat e papërsëritura me të tretët, mospërputhja mes sipërfaqes në tapi dhe tokës që punohet realisht, si dhe fakti që shumë fermerë ndodhen jashtë shtetit, përbëjnë pengesat kryesore.
Read more:Përfshihet nga zjarri një banesë në Levan të Fierit, flakët shkrumbojnë totalisht objektin (VIDEO)
“Ka shumë fermerë që kanë kontrata me të tretë të papërsëritura ose kanë mungesë dokumentacioni… Në dokumentacion ka një sipërfaqe 2 ha por ai ka zënë më shumë, rreth 5 ha. Ky është një fenomen që do ta vështirësojë pak procesin”, theksoi Nusret Avdullai.
Çdo kërkesë dëmshpërblimi duhet të shoqërohet patjetër me dokument pronësie, certifikatë legalizimi ose vërtetim nga njësia administrative. Mungesa e tyre do të penalizojë fermeret e prekur nga zjarret në Fier.
