Vijon sot protesta kundër qeverisë dhe kryeministrit Edi Rama, e cila shënon ditën e 119-të të qëndresës qytetare.
Protesta e djeshme u zhvillua mes fjalimeve, pankartave dhe thirrjeve kundër qeverisë, ndërsa në përfundim të tubimit qytetarët nisën marshimin në rrugët e Tiranës. Gjatë marshimit u dëgjuan thirrje si “Rama në burg”, “Arrestoni Ramën dhe Ballukun” dhe “Dorëheqje”.
Read more:“Shqipëria e shqiptarëve, vdekje tradhtarëve”, vijon protesta qytetare kundër qeverisë
Në ditën e 118-të, protestuesit vijuan të shprehin kundërshtimin ndaj qeverisë përmes pankartave dhe sloganeve. Një prej tyre shkruante: “Me SHISH e me polici, nuk e mbani dot këtë tirani”, ndërsa një tjetër i drejtohej SPAK-ut për situatën në shëndetësi: “Shëndetësia ra, fiktiviteti u pa! SPAK mos rri, por vepro, hajdutët na i ndëshkoi.”
Gjatë protestës së djeshme, aktivistët dhe qytetarët përsëritën kërkesat për largimin e kryeministrit, ndërsa disa prej tyre ashpërsuan edhe më tej gjuhën e protestës. Aktivisti Edison Lika deklaroi se, sipas tij, “koha për dorëheqje ka mbaruar” dhe se thirrja e protestuesve do të jetë tashmë “Arrestoni Ramën”.
Edhe sot, qytetarët pritet të mblidhen sërish në shesh, ndërsa protesta vijon me fjalime, pankarta dhe marshim në rrugët e kryeqytetit.
