Kombinimet e vakteve kanë një rëndësi të jashtëzakonshme në organizmin tonë. Ato ndikojnë si në shëndetin fizik, ashtu edhe në atë mendor. Nutricionisti Altin Joka, në emisionin “Rreze Dielli” në Report Tv, shpjegoi kombinimet e duhura dhe ato të gabuara të ushqimeve.
“Shpesh e shohim ushqimin në mënyrë të gabuar, duke harruar se ai ka ritmin dhe rregullat e veta. Ushqimi është një strukturë e kombinuar me minerale, vitamina, enzima etj. Një ushqim edhe pse i shëndetshëm mund të bëhet i dëmshëm kur kombinohet me një tjetër. Çdo vakt që marrim i jep një sinjal trupit; nëse kombinohet siç duhet sjell balancë, përndryshe sjell ndryshime në tretje, enzimat nuk veprojnë në mënyrë optimale, rritet fermentimi dhe prodhimi i gazrave”, shpjegoi Joka.
Sipas tij, kombinimet e gabuara ndikojnë edhe në mikrobiomë, duke pakësuar bakteret e mira në zorrë. Kjo rrit inflamacionin në zorrë dhe rrezikon kalimin e toksinave në gjak. Këto procese, sipas Jokës, ndikojnë edhe në aspektin metabolik, duke sjellë lodhje, rritje të tensionit, rezistencë ndaj insulinës dhe rritje të kortizolit, deri në shfaqjen e sëmundjeve të ndryshme.
Rregullat bazë të ushqyerjes
Vakti duhet të jetë i vogël, i thjeshtë dhe pa shumë përzierje të rënda. Vaktet e mëdha, të pasura me yndyrna dhe sidomos kur pas tyre konsumohen ëmbëlsira apo fruta, sjellin rëndim të stomakut.
Kombinimi i bukës me mishin, ëmbëlsirat dhe patatet krijon ngadalësim të tretjes.
“Duhet të dëgjojmë më shumë trupin: të hamë ngadalë dhe të ndiejmë lehtësi. Duhet t’i japim kohë tretjes dhe të përtypim ushqimin mirë. Nuk duhet të ulemi në tavolinë kur jemi të nervozuar. Ka raste kur ngrënia në gjendje emocionale të rënduar mund të jetë shumë e dëmshme, madje dhe fatale për jetën”, theksoi Joka.
Read more (Deti):“Nëse do të priteshin kabllot nënujore në Hormuz, do të shkaktohej katastrofë e madhe”, Irani bën kërcënimin e radhës
Ngrënia e tepërt pa pushim dëmton metabolizmin. Ushqimi nuk duhet të krijojë “kaos” në organizëm. Yndyrnat dhe proteinat e kombinuara gabim sjellin probleme me tretjen dhe fermentimin.
Duhet treguar kujdes edhe ndaj nivelit të vitaminave, mineraleve dhe hekurit në ushqime. Mikrobioma duhet ushqyer me baktere të mira, përmes fibrave, probiotikëve dhe antioksidantëve.
Kombinimet më të shëndetshme sipas vakteve
Në mëngjes mund të përgatisni:
- Smoothie me spinaq ose lakër kale, mollë, limon, fara chia, vaj ulliri dhe avokado
- Avokado me qumësht dhie, kanellë, alga deti dhe kripë deti
- Kefir me fruta pylli, bajame, mjaltë, fara chia dhe arra
- Lëng panxhari, molle, limoni dhe xhenxhefili
- Lëng portokalli me xhenxhefil dhe karrotë
- Lëng molle, kastraveci, limoni dhe menteje (i përshtatshëm për stomak me gastrit)
Read more (Rreze Dielli):Rama sjell pamje pranverore nga Durrësi, plazhi mbushet me njerëz që marrin rreze
Një drekë e balancuar
- Supë me lëng kockash, vaj ulliri, selino, karrota, patate të kuqe, majdanoz dhe qepë
- Supë thjerrëzash me vaj ulliri, limon, hudhër dhe karrotë
- Supë jeshile me karrotë, spinaq dhe fara kungulli
- Supë me kungull të verdhë, xhenxhefil, mente, karrotë dhe fara susami
- Supë pule me karrotë, kopër, gjalpë dhe selino
- Supë me borzilok, vaj ulliri dhe hudhër
- Bukë e bërë në shtëpi me miell të mirë pa maja, me vaj ulliri dhe shoqëruar me domate, qepë, rigon dhe djathë
- Karrota dhe domatja të kaurdisura në vaj ulliri, pasi rritet përthithja e ushqyesve
- Tarator me hudhër, kopër, vaj ulliri, arra dhe fara – shumë i mirë për mikrobiomën
- Mish me perime (jeshillëqe, patate, karrota dhe kunguj në furrë)
- Mish me oriz apo oriz me fasule
- Mollë me arra, kanellë dhe kos – ndihmon në stabilizimin e glicemisë dhe uljen e oreksit emocional
- Banane me kos dhe gjalpë kikiriku
Read more (Ushqimi):Disa ushqime që ndihmojnë në uljen e teshtitjes, bllokimit të hundës dhe simptomave të alergjisë
Read more (Vitamina):ElitaPlus prezanton pakot e analizave me zbritje deri në -33% – kontroll i plotë shëndetësor në një vend
Kombinimet e gabuara
- Lengjet e frutave miks pa shoqërim me arra apo fara
- Supë me bukë të bardhë
- Kapuçino me briosh
- Pizza dhe hamburger me Coca-Cola dhe patate – rrisin sheqerin, dëmtojnë zorrën dhe krijojnë stres metabolik
- Kotoleta të skuqura në vaj
- Drithëra mëngjesi me sheqer dhe qumësht
- Fruta të thata me çokollatë
- Mish me patate të skuqura
- Bukë e bardhë me reçel
- Proshutë dhe sallamra me djathë – rrisin rrezikun kardiovaskular
- Ushqim i skuqur me alkool – rrit inflamacionin në organizëm
