Partia Demokratike nuk do të ketë garë, por referendum më 23 maj. Selia blu ka vendosur të mos pranojë asnjë kandidat përballë Sali Berishës dhe të legjitimojë këtë të fundit në zgjedhjet për kryetar. Ndërkohë PD ka nisur punën sot edhe për ndryshimet në statut.
***
“Kam shumë respekt për Doktorin sepse e kam koleg, profesor!”
Shpresa e mjekes Mereme Sela për të rivalizuar doktorin që drejton PD-në, zgjati vetëm 24 orë. PD i hapi pragun për të dorëzuar dosjen e aplikimit, por nxitoi t’i mbyllte derën e garës, duke legjitimuar vetëm Sali Berishën kandidat për kreun e PD-së në zgjedhjet e 23 majit.
Bashkë me Mereme Selën, që pasi i bëri skanerin, PD thotë se nuk ka një profil të lartë publik e politik ndaj nuk mund të jetë kandidate, u skualifikua edhe një tjetër emër i cili u mësua publikisht vetëm këtë të premten, Vladimir Mulaj, tërësisht i panjohur dhe siç thotë selia blu, pa eksperiencë në drejtimin e strukturave demokrate.
Komisioni i Organizimit dhe Kontrollit të Operacioneve elektorale në PD nuk ka marrë fare në shqyrtim dokumentet që mbërritën në disa mënyra qoftë fizikisht, por edhe përmes postës elektronike të Evi Kokalarit, Alesia Balliut dhe Ervin Salianjit. Justifikimi për të tre, është “vetëpërjashtimi”.
“Kërkesat e mbërritura, për shkak se nuk plotësojnë kushtin e paraqitjes nga një anëtar i Partisë Demokratike, nuk mund të shqyrtohen”-thuhet në vendim.
Por teksa fituesi i garës për kryetar tashmë u paracaktua, PD po punon seriozisht mbi ndryshimet në statut.
Read more (PD):Ndotja e ajrit në Tiranë, Partia Demokratike: Është në nivele alarmante, duhet hetim
Grupi i punës u mblodh për të caktuar kalendarin e punës duke i lënë afat 14 majin çdo kujt që dëshiron të bëjë propozime. Brenda 25 majit drafti do t’i paraqitet kryesisë për miratim për t’i lënë më pas vendin miratimit final në Kuvendin e thirrur më 30 maj.
Report Tv ka mësuar se heqja e nenit “Basha” ku kryetari ikën nga partia pasi humb zgjedhjet parlamentare, nuk është opsion, por diskutime po bëhen mbi primaret, të vendosura me bujë nga Sali Berisha, por që tashmë po shihet me skepticizëm pas dështimit për të qenë vota e demokratëve ajo që i vendos vulën vendimmarrjeve në parti.
Kliko këtu për të lexuar dokumentin e plotë
Berisha i vetëm në garën për kreun e PD, Salianji pas përjashtimit: Ka humbur kështjellën e fundit, burrërinë! Partia nuk e meriton të shuhet për shkak të liderit të saj
Ish-deputeti i Partisë Demokratike, Ervin Salianji, ka reaguar pas skualifikimit nga kandidimi për kreun e PD-së të Mereme Selës dhe Vladimir Mulaj (Sali Berisha do të jetë i vetmi kandidat në zgjedhjet e 23 majit për kreun e PD-së).
Përmes një postimi në rrjetet sociale, Salianji shkruan se Berisha dhe njerëzit në PD që i shërbejnë interesave të tij, po e çojnë këtë forcë politike drejt shuarjes.
Teksa thekson se PD nuk duhet të jetë parti e një individi, Salianji shkruan më tej se Berisha është i konsumuar, i izoluar, i hetuar dhe i paaftë për të bashkuar opozitën.
Read more (mereme sela):Iu pranua aplikimi, Mereme Sela për Report Tv: Kam kontribut të madh në mjekësi, kjo më shtyu të garoj përballë Berishës për kryetare të PD!
Në përfundim Salianji paralajmëron Berishën se i ka bërë llogaritë gabim me të, teksa u kërkon demokratëve që të mos heshtin përballë kësaj situate.
Reagimi i Salianjit:
Standardi mizerabël se si Berisha po trajton Partinë Demokratike shpreh mungesën e thellë të përgjegjësisë historike për sakrificat e demokratëve që prej 13 vitesh dergjen në opozitë.
Shpërfaqja e këtij shtetari deri në degradim total me ndasi, me idiotësi, me miq dhe armiq imagjinar…. me rrena dhe gënjeshtra të poshtra që i kanë lënë demokratët 13 vite rrugëve, shprehin humbjen e e “kështjellës” së fundit që ai kishte arritur të fshinte: burrërinë.
Ai dhe rrethi që i kacavirret abuzon me besnikërinë dhe vlerat e demokratëve, duke i vendosur përballë një presioni moral: të heshtin “për respekt të moshës”, të heshtin përballë “ndereve që i janë bërë”, të heshtin para shuarjes së PD për shkak të lidhjes me të.
Kush mban përgjegjësi për humbjen më të thellë që nga 1997, me 11 Maj 2025? Kush i bëri listat? Kush hartoi programin banal sikur të ishte viti 1995? Kush e drejtoi fushatën?
Dhe pyetja më e rëndësishme: si do të fitojë Partia Demokratike?
Edhe demokratët më të fandaksur e dinë që me Sali Berishën dhe këtë lidership, nuk do fitohet kurrë.
Read more (evi kokalari):Gara për kreun e PD/ Berisha u mbyll dyert Kokalarit, Balliut dhe Salianjit, s’iu pranon kandidaturën! Aplikimin e dorëzon vetëm një mjeke
Çdo ditë që ai qëndron në krye të Partia Demokratike e Shqipërisë është një humbje për opozitën dhe për Shqipërinë.
Koha punon vetëm për ndryshimin. Sali Berisha nuk mund ta përfaqësojë kurrë atë.
Ai është i konsumuar, i izoluar, i hetuar, i paaftë për të bashkuar opozitën.
Nuk mund të flasim për ndryshim në Shqipëri, duke refuzuar ndryshimin në PD. Ne nuk mund të kërkojmë votën e shqiptarëve kështu.
Partia Demokratike nuk mund të jetë kurrë e fortë pa garë, pa përfaqësim, pa përgjegjësi.
Çdo përpjekje për t’i shmangur këto e dobëson Partinë Demokratike dhe e largon nga qytetarët.
Read more (Alesia Balliu):Efekti Mereme: Molotovi cinik i spinëve të Berishës në një ditë të keqe!
Partia Demokratike nuk mund të jetë parti individi, nuk e meriton të jetë! Ajo duhet të rikthehet në një parti masash dhe pushteti. Ajo është pronë e demokratëve dhe shpresa e mijëra shqiptarëve që presin rotacionin prej vitesh!
PD nuk e meriton të shuhet për shkak të liderit të saj.
Llogaritë i kanë bërë gabim, veçanërisht me mua dhe shumicën e demokratëve.
Koha thërret demokratët të mos heshtin.
Mblidhet Grupi i Punës për ndryshimet në Statutin e PD, miratohet kalendari i punës
Grupi i Punës në Partinë Demokratike është mbledhur sot në selinë blu ku është miratuar dhe kalendari për vijim e praktikës që do të ndiqet për ndryshimin e statutit të partisë.
Kalendari i Punës për ndryshimet në statut
1. 1 Maj – 10 Maj 2026 – Secili anëtar i Partisë, Kryesisë, Këshillit Kombëtar, Grupit Parlamentar, Kuvendit Kombëtar mund të paraqesë propozime për ndryshime/përmirësime në Statut. Edhe sescili anëtar i Grupit të Punës duhet të paraqesë mendime/propozime me shkrim për ndryshime apo shtesa në Statut.
Read more (ervin salianji):Udhëzimi i PD/ Çipa: Akti i fundit i Berishës për hipotekimin e partisë! Karaj: Saliu e cilësonte Salianjin të dënuar politik, sot po e përjashton nga gara për kryetar
2. 11 Maj – 14 Maj 2026 – Shqyrtimi i të gjitha propozimeve të paraqitura brenda afatit më sipër.
3. 15 Maj – 20 Maj 2026 – Hartimi i ndryshimeve dhe propozimi final i grupit të punës mbi ndryshimet e mundshme në Statutin e PD. Dorëzimi i ndryshimeve Kryetarit dhe Sekretarit të Përgjithshëm të Partisë për ndjekjen e procedurave të mëtejshme statutore.
4. Brenda 25 Maj 2026 – shqyrtimi dhe miratimi nga Kryesi/Këshill Kombëtar dhe propozimi për miratim në Kuvendin Kombëtar të PD.
5. 30 Maj 2026 – Shqyrtimi dhe miratimi nga Kuvendi Kombëtar i PD.
SHËNIM: Deri në momentin e shqyrtimit dhe miratimit të propozimit nga Kryesia/Këshilli Kombëtar i PD, propozimet, puna dhe produkti i Grupit të Punës për ndryshimet në Statut është konfidenciale dhe mbledhjet e tij janë të mbyllura.
Kliko këtu për të lexuar dokumentin e plotë
