Ministri gjerman i Mbrojtjes Pistorius ka njoftuar projekte të përbashkëta me Ukrainën që do të përfshijnë dronë me një rreze veprimi deri në 1,500 kilometra.
Ministri gjerman i Mbrojtjes, Boris Pistorius, zgjeroi ndjeshëm bashkëpunimin ushtarak të Gjermanisë me Ukrainëngjatë një vizite në Kiev. Fokusi është në zhvillimin e përbashkët të sistemeve moderne të dronëve dhe armëve, sipërmarrjet e reja të përbashkëta në industrinë e mbrojtjes dhe një shkëmbim intensiv të të dhënave dhe teknologjive ushtarake.
“Ukraina dhe Gjermania, ne jemi partnerë strategjikë”, tha Pistorius në një takim me Ministrin ukrainas të Mbrojtjes, Mykhailo Fedorov. Gjermania jo vetëm që po e mbështet Ukrainën në mbrojtjen e saj kundër Rusisë, por është gjithnjë e më e përkushtuar edhe për bashkëpunim afatgjatë në sektorin e mbrojtjes.
Bashkëpunimi për dronët dhe trajnimin
Pistorius ishte veçanërisht specifik në lidhje me projektet e planifikuara të dronëve. Gjermania synon të intensifikojë bashkëpunimin midis kompanive gjermane dhe ukrainase. Në veçanti është planifikuar zhvillimi dhe prodhimi i përbashkët i sistemeve ajrore pa pilot “me rreze të ndryshme veprimi prej më pak se 100 kilometra deri në 1.500 kilometra”.
Fokusi do të jetë edhe në të ashtuquajturat aftësi goditjeje në thellësi, sulme ndaj objektivave ushtarake thellë brenda territorit të një armiku. Pistorius sheh mangësi të konsiderueshme midis shteteve evropiane të NATO-s, veçanërisht në lidhje me sistemet e armëve me rreze të gjatë veprimi.
Edhe trajnimi i ushtarëve ukrainas do të vazhdojë. Gjermania ka trajnuar “pothuajse 27.000 ushtarë ukrainas” deri më sot, tha Pistorius. Kjo do të vazhdojë, “edhe pas një armëpushimi”. Trajnimi është “një nga disa komponentë të garancive të mundshme të sigurisë evropiane”.
Refuzimi i iniciativës Schröder të Putinit
Në të njëjtën kohë, Pistorius shprehu skepticizëm në lidhje me deklaratat e Presidentit rus Vladimir Putin se lufta mund të jetë duke iu afruar fundit. “Nëse ai e sheh fundin e kësaj lufte që po afrohet, atëherë ai thjesht mund ta përfundojë atë”, tha Ministri i Mbrojtjes.
Putin mund të tërheqë trupat e tij ose të ofrojë negociata pa parakushte. Në vend të kësaj, ai po bën përsëri kërkesa. “Shpresoj se gabohem, se ky është vetëm një mashtrim tjetër, por nuk mund të përjashtohet”, vazhdoi Pistorius.
Gjatë fundjavës, Putin hodhi edhe idenë që ish-Kancelari Gerhard Schröder të bëhet ndërmjetësues i mundshëm në bisedime me Ukrainën. Qeveria gjermane e hodhi poshtë menjëherë propozimin. Zëdhënësi i qeverisë Stefan Kornelius tha në Berlin se komentet e Putinit nuk përfaqësonin ende “asnjë përparim të konsiderueshëm”. Rusia nuk i ka ndryshuar kushtet e saj për negociata. Propozime të tilla synonin qartësisht ndarjen e opinionit publik në Gjermani.
Edhe reagimi në nivelin e BE-së ishte i fortë. Përfaqësuesja e Lartë e BE-së, Kaja Kallas, deklaroi në një takim të ministrave të jashtëm në Bruksel: “Nëse do t’i jepnim Rusisë të drejtën për të emëruar një negociator në emrin tonë, kjo nuk do të ishte shumë e mençur.” Schröder ka qenë lobus për kompanitë shtetërore ruse. “Atëherë ai, në një farë mënyre, do të ishte ulur në të dyja anët e tryezës,” tha Kallas.
Ministri i Jashtëm ukrainas, Andriy Sybiha, deklaroi shkurt: “Ne nuk e mbështesim këtë.” Disa ministra të tjerë të jashtëm evropianë shprehën dyshime në lidhje me përshtatshmërinë e Schröder si ndërmjetës. Ministri i Jashtëm estonez, Margus Tsahkna, tha: “Gerhard Schröder nuk do ta përfaqësojë Evropën.” Ministrja e Jashtme austriake, Beate Meinl-Reisinger, theksoi se vetëm BE-ja, dhe jo Rusia, do të vendoste për ndërmjetësit e mundshëm.
Sanksionet prekin personat përgjegjës për deportimet e fëmijëve
Ndërkohë, ministrat e jashtëm të shteteve anëtare të BE-së kanë vendosur për sanksione të mëtejshme kundër atyre që janë përgjegjës për programin rus të deportimit me forcë të fëmijëve ukrainas. Sanksionet përfshijnë ngrirjen e aseteve në BE por edhe ndalime për individë të afërt me qeverinë ruse.
Midis personave të sanksionuar janë kreu i një kampi që strehon të mitur ukrainas dhe institucionet përgjegjëse për indoktrinimin ideologjik, “rusifikimin” dhe edukimin militar të fëmijëve.
Që nga fillimi i pushtimit në shkallë të gjerë të Ukrainës nga Rusia në vitin 2022, rreth 20.000 fëmijë ukrainas janë çuar në Rusi ose në territoret e pushtuara, sipas Komisionit Evropian. Shumë prej tyre u detyruan të ndryshonin identitetin dhe shtetësinë e tyre dhe u dhanë për birësim. Pavarësisht përpjekjeve ndërkombëtare, autoritetet ukrainase raportojnë se vetëm rreth 2.100 fëmijë janë kthyer në Ukrainë deri më tani.
Sipas burimeve ushtarake perëndimore, Rusia po vihet nën një presion ushtarak në rritje. Në prill, për herë të parë në disa vitet e fundit, ushtria ruse humbi më shumë territor në Ukrainë sesa ishte në gjendje të ripushtonte. Në të njëjtën kohë, thuhet se janë vrarë apo plagosur 35,000 forca ruse vetëm këtë muaj. Dronët e Ukrainës, tani po godasin rregullisht objektiva shumë larg vijës së frontit.
/DW
