Një i paraburgosur në Shkodër, i cili gjendej në të njëjtën qeli me të birin, ka humbur jetën mëngjesin e së dielës. Sipas njoftimit të Drejtorisë së Burgjeve, 62-vjeçari me iniciale Ç. J., pësoi një problem shëndetësor dhe pasi mori ndihmën e parë nga mjekët e burgut, u dërgua në Spitalin e Koplikut për shkak të gjendjes së rënduar.
Pavarësisht përpjekjeve të bluzave të bardha për ta stabilizuar, ai humbi jetën. Organet kanë nisur punën për zbardhjen e plotë të rastit.
“Në orët e para të mëngjesit të datës 28.06.2026, në IEVP Shkodër u regjistrua një emergjencë shëndetësore. I paraburgosuri me inicialet Ç. J., i datëlindjes 10.11.1964, i cili ishte i akomoduar në të njëjtën dhomë me të birin, të burgosurin me inicialet D. J., pësoi një përkeqësim të papritur të gjendjes shëndetësore, çfarë bëri të nevojshme ndërhyrjen e menjëhershme të personelit mjekësor.
Read more:Akt devotshmërie, Kardinal Ernest Simoni ngjit Kodrën e Shfaqjeve në moshën 97-vjeçare
Personeli shëndetësor i institucionit i ofroi menjëherë ndihmën e parë dhe, për shkak të rëndimit të gjendjes, u vendos transportimi i tij me urgjencë drejt Spitalit të Koplikut.
Gjatë transportit, si dhe pas mbërritjes në urgjencën spitalore, stafi mjekësor kreu të gjitha procedurat e reanimimit kardiorespirator, por, pavarësisht përpjekjeve të vazhdueshme, mjekët konstatuan ndarjen e tij nga jeta.
Në përputhje me procedurat ligjore, organet kompetente janë njoftuar menjëherë dhe kanë nisur veprimet procedurale për dokumentimin e plotë të rastit dhe sqarimin e rrethanave të ngjarjes.
Drejtoria e Përgjithshme e Burgjeve shpreh ngushëllimet e sinqerta familjes së të ndjerit dhe garanton bashkëpunim të plotë me organet e drejtësisë për zbardhjen e plotë të këtij rasti”,thuhet në njoftim.
