Mbarë bota përkujton 10 vjetorin e shenjtërimit të humanistes së shquar Nënë Tereza. “Me gjak, unë jam shqiptare. Me shtetësi, jam indiane. Me besim, unë jam një murgeshë Katolike. Sipas profesionit tim, unë i përkas botës. Për nga zemra ime, unë i përkas plotësisht Zemrës së Jezusit”. Këto janë fjalët e thëna nga Nënë Tereza, gruaja e jashtëzakonshme dhe shenjtorja e të varfërve të të gjithë botës e cila kurrë nuk e harroi origjinën e saj.
10 vite më parë, më 5 shtator 2016, nëna e madhe e të varfërve, fituese e çmimit Nobel për Paqen, u shpall shenjtore. Papa Françesku, njohu dy mrekullitë e saj, të shërimit të të sëmurëve pas vdekjes së saj më 1997. Murgesha ‘u lumturua’ në tetor të vitit 2003, nga Papa Gjon Pali II. Ai miratoi mrekullinë e parë pas vdekjes së saj. Një grua 30-vjeçare në Kalkuta tha se ajo u shërua nga një tumor në stomak pas lutjeve të Nënë Terezës. Një komitet i Vatikanit tha se nuk mund të gjente asnjë shpjegim shkencor për shërimin e saj dhe e shpalli atë një mrekulli.
Në këtë ditë të shënuar, Nënë Tereza përkujtohet nga krerët më të lartë të shtetit dhe politikës.
Kush ishte Nënë Tereza?
Anjezë Gonxhe Bojaxhiu, që më vonë e ndryshoi emrin në Nënë Tereza, lindi me 1910 nga prindër shqiptarë dhe humbi jetën në Kalkutë më 5 shtator 1997. Sot bëhen 27 vite që Nënë Tereza është ndarë nga jeta. Ajo i mori mësimet e para në një shkollë në qytetin e Shkupit dhe në moshën 18 vjeçare u dorëzua murgeshë. Pasi u specializua në Irlandë u vendos në Indi, ku në vitin 1950 themeloi urdhrin e saj të murgeshave të quajtur Misionarët e Bamirësisë.
Read more:10 vite nga shenjtërimi i Nënë Terezës, humanistja shqiptare që ia kushtoi jetën të varfërve
Nga ky moment Nenë Tereza do të bëhej nënë e të gjithëve dhe jetën e saj do t’ia dedikonte tërësisht të varfërve. Ajo vazhdoi me vetmohim të predikonte mesazhin e saj të dinjitetit njerëzor dhe respektit për çdo qenie njerëzore të lindur apo jo.
Kur mori çmimin Nobel për Paqe në vitin 1979 ajo bëri këtë apel: “Shkatërrimtari më i madh i paqes së sotme është thirrja e një fëmije të pafajshëm ende të palindur. Nëse një nënë vret fëmijën që mban në barkun e saj, atëherë çfarë mbetet për ty dhe mua?
Nënë Tereza ndërroi jetë më 5 shtator 1997 në Kalkuta të Indisë, ku ushtroi pjesën më të madhe të aktivitetit të saj bamirës, por figura e saj vazhdon të jetë burim frymëzimi për bamirësi, besim dhe shërbim të përulur, veçanërisht në një botë gjithnjë e më të përçarë nga varfëria dhe padrejtësitë sociale. Gjatë jetës së saj, Nënë Tereza ka marrë më shumë se 700 çmime për punën e saj bamirëse.
‘Përfaqëson më të mirën tek të gjithë ne’, Ambasada e SHBA kujton shenjtërimin e Nënë Terezës: Ia kushtoi jetën të varfërve dhe të sëmurëve
Foto: Nënë Tereza
Ambasada e Shteteve të Bashkuara në Tiranë ka kujtuar sot shenjtërimin e Nënë Terezës, duke vlerësuar kontributin dhe përkushtimin e saj ndaj njerëzve më në nevojë.
Në një postim në rrjetet sociale, ambasada thekson se Nënë Tereza ia kushtoi jetën të varfërve, të sëmurëve dhe të harruarve, duke u shndërruar në një simbol të humanizmit dhe shërbimit ndaj të tjerëve.
Ambasada ka sjellë gjithashtu një citim të Presidentit amerikan Donald Trump, i cili e ka cilësuar Nënë Terezën si një figurë që ‘përfaqëson më të mirën tek të gjithë ne’.
“Sot, kujtojmë shenjtërimin e Nënë Terezës, një grua që ia kushtoi jetën e saj më të varfërve, të sëmurëve dhe të harruarve, duke i kujtuar botës se madhështia gjendet te shërbimi, jo te statusi. Siç ka thënë Presidenti Trump, ajo “përfaqëson më të mirën tek të gjithë ne”, shkruhet në faqen zyrtare të ambasadës amerikane.
Meta përkujton shenjtërimin e Nënë Terezës: Le të jetë frymëzim për të ndërtuar çdo ditë një Shqipëri më të drejtë
Foto: Ilir Meta
Kreu i Partisë së Lirisë ka përkujtuar 10-vjetorin e shenjtërimit të Nënë Terezës. Përmes një postimi në rrjetet sociale Meta shprehet se Nënë Tereza le të jetë një frymëzim për të ndërtuar çdo ditë një Shqipëri më të drejtë dhe më pranë halleve të qytetarëve, duke rikthyer shpresën dhe dinjitetin për çdo familje shqiptare.
“Sot, në kremtimin e Shenjtërimit të Shën Nënë Terezës, krenarisë sonë kombëtare dhe simbolit të jashtëzakonshëm të nënës shqiptare dhe dashurisë në veprim, kujtojmë mesazhin e saj të përjetshëm, të bëjmë gjëra të vogla me dashuri të madhe, me përulësi, solidaritet dhe përkushtim ndaj kujtdo që ka më shumë nevojë.
Le të jetë shembulli i jetës dhe veprave të Saj frymëzim për të ndërtuar çdo ditë një Shqipëri më të drejtë, më njerëzore dhe më pranë halleve të qytetarëve, duke rikthyer shpresën dhe dinjitetin për çdo familje shqiptare”, shkroi Meta.
10 vjet nga shenjtërimi i Nënë Terezës, ambasadorja e BE-së: Trashëgimia e saj duhet të na frymëzojë
Në 10-vjetorin e shenjtërimit të Nënë Terezës, ambasadorja e Bashkimit Evropian në Shqipëri, Sofia Moreira de Sousa, ka përkujtuar humanisten shqiptare.
Në mesazhin e saj, ambasadorja ka ndarë edhe një prej shprehjeve të Nënë Terezës: “Jo të gjithë mund të bëjmë gjëra të mëdha. Por mund të bëjmë gjëra të vogla me dashuri të madhe”.
“Këtu në Shqipëri, në atdheun e Nënë Terezës, mesazhi i saj ndihet veçanërisht i afërt”, shkruan Moreira de Sousa.
Ambasadorja thekson se trashëgimia e Nënë Terezës duhet të frymëzojë për t’u shërbyer njerëzve me humanizëm dhe për të mbrojtur dinjitetin, solidaritetin dhe gjithëpërfshirjen, të cilat i cilëson edhe si vlera themelore të Bashkimit Evropian.
“Sot nderojmë një trashëgimi që duhet të na frymëzojë të gjithëve: të shërbejmë me humanizëm, t’u qëndrojmë pranë njerëzve dhe të punojmë çdo ditë për të mbrojtur dinjitetin, solidaritetin dhe gjithëpërfshirjen, vlera që qëndrojnë në themel të Bashkimit Evropian,” shkruan Ambasadorja e BE-së, Sofia Moreira de Sousa.
Presidenti Begaj përkujton Shenjtoren Nënë Tereza: Amanet për të qenë pranë atyre që kanë më shumë nevojë
Presidenti Bajram Begaj ka përkujtuar sot Shenjtoren Nënë Tereza, duke vlerësuar misionin dhe përkushtimin e saj ndaj njerëzve në nevojë.
Read more:Rama gjen zëvendësuesen e Evis Salës, Klodiana Spahiu emërohet ministre e Shëndetësisë
Kreu i Shtetit thekson se, përmes shërbimit ndaj të varfërve, të pamundurve dhe të sëmurëve, Nënë Tereza dëshmoi madhështinë e dinjitetit njerëzor.
“Drita e shpirtit të saj mbetet një burim frymëzimi dhe shërimi për mbarë njerëzimin”, shkruan Begaj.
Sipas Presidentit, për shqiptarët Nënë Tereza mbetet një udhëzim dhe një amanet për të qenë pranë atyre që kanë më shumë nevojë, duke besuar te dashuria, drejtësia dhe shpresa.
