Shqipëria po i afrohet një prej sfidave më të rëndësishme të viteve të ardhshme jo vetëm anëtarësimit në Bashkimin Evropian, por edhe aftësisë për të përfituar realisht nga mundësitë që ai sjell.
Në një intervistë për Top Channel Grzegorz Zielinski, Drejtor Menaxhues i BERZH për Evropën Juglindore shprehet se si një nga çështjet kryesore që Shqipëria duhet të arrijë është kapaciteti i vendit për të përgatitur dhe zbatuar projektet, ndërsa sugjeron që ecuria nuk duhet të kufizohet vetëm në nivelin qendror.
“Ky është një problem në Shqipëri dhe është një problem edhe në të gjitha vendet fqinje. Dhe kjo është veçanërisht e rëndësishme në kontekstin e anëtarësimit në BE. Sepse herët a vonë, nuk do të bëhet fjalë vetëm për përgatitjen e projekteve që mund të financohen nga BERZH-i apo nga institucionet tona simotra por për përdorimin në kohë dhe në mënyrë efikase të fondeve të BE-së, qofshin ato fonde para anëtarësimit apo pas anëtarësimit. Dhe kjo është thelbësore për të siguruar që ky financim i rritjes së ekonomisë shqiptare, ku fondet e BE-së do të jenë “karburanti”, të përdoret sa më efikas dhe sa më fuqishëm që të jetë e mundur, në mënyrë që rritja të jetë shumë më e shpejtë”, u shpreh Grzegorz Zielinski.
Por ndërsa BE-ja shihet si mundësi, ekonomia shqiptare hyn në këtë proces me një tjetër dobësi, eksportet mbeten me kompleksitet të ulët dhe vendi vijon të jetë importues neto i mallrave.
Sipas BERZH, Shqipëria duhet të kalojë nga konkurrenca me kosto të ulët te produktet dhe shërbimet me më shumë vlerë të shtuar.
“Bizneset duhet të jenë shumë më të lidhura me njëra-tjetrën. Mendoj se përvoja e vendeve të tjera të rajonit është një shembull i mirë për t’u parë. Pra, bëhet fjalë për të siguruar që mallrat dhe shërbimet e prodhuara në Shqipëri të bëhen konkurruese në tregun pan-evropian”, deklaroi Zielinski.
Ndalur te biznesi, BERZH shprehet se financimi nga institucioni do të jetë i disponueshëm por jo pa kushte.
“Nuk bëhet fjalë vetëm për të marrë financim, por për të marrë financim dhe për ta përdorur atë në një mënyrë që përputhet me prioritetet dhe avantazhet konkurruese të së ardhmes”, tha Zielinski.
Gazetarja: Nëse Shqipëria do të bëhej anëtare e BE-së nesër, cilat janë fushat kryesore të ekonomisë që mendoni se duhet të përmirësohen më tej që sot, për të garantuar një ekonomi më të fortë dhe më konkurruese brenda Bashkimit Evropian?
“Nuk mund të mos e ritheksoj rëndësinë e përdorimit efikas të fondeve të BE-së.Për këtë arsye, kapaciteti për përgatitjen e projekteve dhe kapaciteti për përthithjen e fondeve të BE-së duhet të ekzistojnë në të gjitha nivelet. Sidomosbashkitë do të jenë kryesisht ato që do ta drejtojnë këtë ndryshim, i cili, nga ana tjetër, do të përmirësojë infrastrukturën, përfshirë lidhjen me rrugët lokale etj. Kjo infrastrukturë do t’i bëjë investimet e bizneseve private më tërheqëse”, u shpreh Zielinski.
