Kur shohim një apartament të ri në shitje, pas tij nuk është gjithmonë një blerës që jeton në Shqipëri. Interesi nga kjo kategori ka qenë i lartë por me rënie.
Vetëm në gjashtë muajt e parë të këtij viti sipas Bankës së Shqipërisë, rreth një në pesë prona të shitura ka pasur si blerës një jorezident.
Të huajt po mbajnë ende një pjesë të konsiderueshme të tregut shqiptar të pasurive të paluajtshme. Shifrat tregojnë një rënie për gjysmën e parë të vitit ku 20% e pronave janë blerë nga të huajtë nga 25% në gjysmën e dytë të viti 2025. Por trendi shfaqet luhatur në 3 vitet e fundit.
“Të huajtë vijnë blejnë në Shqipëri interesohen kryesisht për prona të tilla si apartamente 1+1, pak më të mëdha por me fokus në bregdet. Janë italianët të parë por nuk mundojnë as gjermanët polakët nordikët, interesi është shumë i lartë nga të gjithë”,tha Orgest Beti-konsulent imobiliar.
Por paratë që vijnë nga jashtë nuk hyjnë në treg vetëm përmes blerjes së apartamenteve. Edhe investimet e huaja direkte po orientohen drejt sektorëve të lidhur ngushtë me pronat. Në total gjatë 6 mujorit të parë të vitit, investimet e huaja direkte kanë kaluar vlerën e 1.1 miliardë eurove, nga rreth 759 milionë euro në të njëjtën periudhë të një viti më parë duke shënuar një rritje prej afro 50%.
“Interesi ndahet shohim që masivisht ndër vite erdhën për apartament por dhe shifrat tregojnë që investimet e huaja janë rritur ndjeshëm në sektor si ndërtim turizmi, hoteleri, etj”.
Interesi i të huajve për tregun shqiptar të pasurive të paluajtshme nuk matet vetëm me apartamentet që blejnë. Ai shfaqet edhe në kapitalin që investohet në ndërtim dhe në projekte të reja.
Një treg ku paratë nga jashtë vazhdojnë të luajnë një rol të rëndësishëm, edhe pse pesha e blerjeve nga jorezidentët ndryshon nga një periudhë në tjetrën.
