TIRANË– SPAK dhe BKH zhvilluan mëngjesin e kësaj të shtune një aksion në Shkodër, ku arrestuan në banesën e tij 50-vjeçarin Bledar Cafi. Cafi akuzohet për trafik droge në grupin kriminal të Rrajave, si vijim të operacionit të dhjetorit 2025 kur u godit ky grup i fuqishëm me bazë në Fushë-Krujë.
50-vjeçari Cafi, personazh i njohur nga autoritetet në fushën e trafikut të drogës, i dënuar më parë edhe në Itali me mbi 4 vite burg, jetonte në Shkodër në këtë banesë, e cila ishte e rrethuar me këto mure, nga të cilat mori emrin edhe operacioni për kapjen e tij “Muri i Lartë”.
Por emri i madh i këtij operacioni të mëngjesit të së shtunës ishte një tjetër. Endrit Dokles alias Indrit Dokle, i shumëkërkuari që prej vitit 2024, i njohur si anëtar i rëndësishëm i ish bandës së Durrësit, GJKKO i ka caktuar një tjetër masë sigurie të premten, për trafik droge.
Dokle, i cili edhe këtë herë i ka shpëtuar prangosjes, është zbuluar nga komunikimet në SkyEECC se ka bashkëpunuar me grupin e Rrajave në të paktën një episod të trafikut ndërkombëtar të kokainës. Me masën ndaj tij dhe Cafit shkon në 17 numri i masave të sigurisë për grupin e Rrajave të Fushë-Krujës.
Dosja është hetuar prej kohësh nga Prokurori Adnand Xholi, i cili më herët ka lëshuar 15 urdhër arreste. Mësohet se në vijim të këtij operacioni SPAK ka zbardhur edhe 3 episode të tjera të trafikut të drogës nga ky grup në vendet e BE-së ku janë zbuluar edhe Dokle e Cafi.
Endrit Dokle, emri i të cilit bëri bujë edhe në janar 2020 kur u lirua me kusht nga gjyqtarja e arrestuar më pas Enkelejda Hoxha, në maj 2024 u shpall në kërkim si pjesë e dosjes Revanshi, i akuzuar për krijim kushtesh për atentate ndaj ish deputetit socialist Arben Ndoka dhe Tori Xheçuka e Erigers Mihasit.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
U arrestua me urdhër të SPAK, kush është Bledar Cafi, i dënuar në Itali për trafik droge
Bledar Cafi, 50 vjeç, i konsideruar nga autoritetet si person me rrezikshmëri të lartë shoqërore, u arrestua me urdhër të SPAK, pasi akuzohet si pjesë e një grupi kriminal të trafikut të drogës. Cafi rezulton person me precedentë të mëparshëm kriminalë dhe është dënuar më herët në Itali për trafik narkotikësh.
Më 4 qershor 2020, Gjykata e Triestes e dënoi Cafin me 4 vite e 2 muaj burg për trafik droge në sasi të mëdha dhe pjesëmarrje në grup të strukturuar kriminal. Ai u shpall në kërkim ndërkombëtar dhe më 25 janar 2021 në Shkodër nga policia shqiptare me qëllim ekstradimin drejt Italisë për të vijuar vuajtjen e dënimit.
Njoftim i policisë së shtetit
Finalizohet operacioni policor i koduar “Muri i Lartë”.
Operacioni nga Policia e Shtetit në bashkëpunim me BKH-në, nën drejtimin e SPAK.
Kapet dhe vihet në pranga një shtetas me rrezikshmëri të lartë shoqërore.
Vijon puna për kapjen e një shtetasi tjetër, i cili gjatë operacionit nuk u gjet në banesë.
Strukturat operacionale dhe hetimore të Policisë së Shtetit, konkretisht Forcat Speciale Renea, Drejtoria e Forcës së Posaçme Operacionale, Drejtoria për Hetimin e Narkotikëve, DVP Shkodër dhe BKH, nën drejtimin e SPAK, në zbatim të urdhrit të Prokurorisë së Posaçme SPAK dhe të vendimit të Gjykatës, kanë zhvilluar dhe finalizuar operacionin policor të koduar “Muri i Lartë”, me qëllim ekzekutimin e masës së sigurimit personal ndaj një shtetasi, si dhe kryerjen e kontrolleve për lokalizimin dhe kapjen e një shtetasi tjetër, i shpallur në kërkim.
Në kuadër të operacionit, në Shkodër u bë e mundur kapja dhe arrestimi i shtetasit B. C., 50 vjeç, lindur dhe banues në Shkodër, person me rrezikshmëri të lartë shoqërore.
Kapja dhe arrestimi i tij u bë në orët e para të mëngjesit të sotëm, në banesën e tij në Shkodër. Gjykata e Posaçme e Shkallës së Parë për Korrupsionin dhe Krimin e Organizuar, më datë 25.09.2026, ka caktuar për këtë shtetas masën e sigurimit personal “Arrest me burg” për veprat penale “Trafikim i lëndëve narkotike”, kryer në bashkëpunim, në formë të grupit të strukturuar kriminal, si dhe “Grup i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”.
Po në zbatim të vendimit të GJKKO-së, u ushtrua kontroll në vendet që i përkasin shtetasit në kërkim E. D., alias I. D., 43 vjeç, lindur në Kukës dhe banues në Tiranë, person në kërkim që prej vitit 2024, për të cilin GJKKO ka caktuar masën e sigurisë “Arrest me burg” për veprat penale “Trafikim i lëndëve narkotike”, kryer në bashkëpunim, në formë të grupit të strukturuar kriminal, si dhe “Grup i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”.
Read more:U ekstradua nga Italia dy ditë më parë, GJKKO lë në burg anëtarin e ‘Visit të Pojës’
Gjatë kontrolleve, ky shtetas nuk u gjet dhe vijon puna për lokalizimin dhe kapjen e tij.
Në kërkim nga SPAK, kush është ish-anëtari i bandës së Durrësit Endrit Dokle! Planet e Ervis Martinajt për ta eliminuar
SPAK lëshon urdhërarrest për ish-anëtarin e Bandës së Durrësit, Endrit Dokle, i akuzuar si pjesë e një grupi kriminal të trafikut të drogës. Me urdhër të SPAK u ushtruan kontrolle në disa ambiente në pronësi të Dokles, por ai nuk është gjetur.
Kjo është masa e dytë e sigurisë që lëshohet për Doklen, i cili është dërguar për gjykim në GJKKO i akuzuar se siguroi kushtet për të vrarë Arben Ndokën.
Emri i Dokles është shfaqur në disa dosje të SPAK kryesisht si objektiv i planeve për eliminimin e tij. Në dosjen “Plumbi i Artë”, i penduari i drejtësisë Nuredin Dumani ka dëshmuar se Ervis Martinaj, i zhdukur prej gushtit 2022, i kishte ofruar 500 mijë euro për vrasjen e Dokles, nga të cilat pretendonte se kishte marrë 100 mijë euro parapagim.
Pas zhdukjes së Ervis Martinajt në gusht të vitit 2022, Dokle u mor në pyetje nga hetuesit. Familjarët e Martinajt kishin kërkuar të hetohej edhe pista e një hakmarrjeje të mundshme nga Dokle, nisur nga pretendimi i Dumanit se Martinaj kishte porositur vrasjen e tij.
Emri i Dokles doli edhe në një tjetër procedim të SPAK. Më 2 qershor 2026, GJKKO dënoi Elvin Merlikën dhe Alket Xhixhën për sigurimin e kushteve për vrasjen e tij, në kuadër të një grupi të strukturuar kriminal.
Endrit Dokle ishte dënuar me burgim të përjetshëm për krimet e kryera kur ishte pjesë e Bandës së Durrësit, por në janar 2020 fitoi lirinë me vendim të gjyqtares së Krujës, Enkelejda Hoxha. Ajo i shuajti dënimin e përjetshëm duke e konvertuar në 25 vite burg dhe më pas e liroi me kusht, duke i kaluar 5 vitet e mbetura në shërbim prove. Dokle kishte qëndruar në qeli që prej vitit 2005. Prokuroria e Krujës e ankimoi vendimin, duke argumentuar se Dokle është një përsëritës krimesh dhe nuk plotësonte kushtet ligjore për lirimin me kusht, por kërkesa është ende në Apel dhe nuk është caktuar ende data për shqyrtimin e saj.
