Varrezat Monumentale “Trëndafilat e Çamërisë” në Kllogjer të Konispolit u mbushën më 27 qershor me pasardhës të familjeve çame, të mbijetuar të dëbimit, përfaqësues institucionesh dhe qytetarë nga Shqipëria e Kosova, të cilët u mblodhën për të përkujtuar 82-vjetorin e gjenocidit grek ndaj popullsisë shqiptare të Çamërisë.
Ceremonia, e organizuar këtë vit nga Bashkia e Konispolit, nisi me homazhe pranë memorialit dhe me një minutë heshtje në nderim të mijëra viktimave që humbën jetën gjatë dëbimit të dhunshëm nga trojet e tyre.
Në aktivitet morën pjesë kryetari i Bashkisë Konispol, Erges Dule, kryetari i PDIU-së Shpëtim Idrizi, deputeti i Partisë Socialiste Ardit Bido, kryetari i nderit i PDIU-së Tahir Muhedini, drejtues të shoqatave çame dhe qindra pjesëmarrës.
Duke përshëndetur të pranishmit, kryetari i Bashkisë Konispol, Erges Dule, e cilësoi Kllogjerin si një vend pelegrinazhi për shqiptarët e Çamërisë dhe ftoi të gjithë të nderonin me heshtje kujtimin e viktimave.
“Ne duhet të jemi bashkë të përkujtojmë këto data dhe të bëjmë që ccështja Ccame të vazhdojë brez pas brezi. Ccamëria nuk është politikë por detyrim moral për secilin prej nesh” tha ai.
Në fjalën e tij, deputeti Ardit Bido vlerësoi faktin që përkujtimi po organizohet tashmë nga një institucion shtetëror, duke theksuar se çështja çame duhet të trajtohet si një çështje kombëtare dhe shtetërore.
“U deshën 50 vjet që Shqipëria të rritej në nivelin e detyrës së vet dhe ta shpallte 27 qershorin ditën e Genocidti ndaj Camërisë. Cameria nuk është dhimbja e atyre që kanë humbur parardhësit dhe trojet, është dhimbja e shqiptarisë, të majtëve dhe të djathtëve, e të gjithë shqiptarëve, është dhimbja jonë e madhe kombëtare” tha ai.
Mesazhe u përcollën edhe nga drejtues të shoqatave çame. Kryetari i Shoqatës “Çamëria” në Shkodër tha se dhimbja e këtij vendi mbetet e gjallë për çdo shqiptar që viziton Kllogjerin. Solidariteti me komunitetin çam u shpreh edhe nga përfaqësuesit e ardhur nga Kosova, të cilët theksuan se historia e dhimbshme e Çamërisë është pjesë e kujtesës së të gjithë shqiptarëve.
Read more:Sarandë/ Tentuan të vrisnin me eksploziv një 57-vjeçar, shpallen në kërkim dy autorët (EMRAT)
Pjesa më emocionale e ceremonisë ishin dëshmitë e të mbijetuarve dhe pasardhësve të tyre, të cilët kujtuan familjarët e humbur gjatë eksodit të vitit 1944.
“Unë kam 12 veta të rrjeshtuar atje. E kam sjell motrën e madhe për të kujtuar viktimat dhe prindërit tanë. Për ne ishte tmerr. Edhe në minutën e vdekjes ata kërkonin gurët e shtëpisë. Ardhjen këtu e kemi të shenjtë se kujtojmë të gjithë ata që kemi lënë në këto fusha” tha një prej tyre.
Një tjetër dëshmi solli historinë tragjike të një familjeje nga Arpica, ku nga nëntë anëtarë që u larguan nga Çamëria mbijetuan vetëm katër.
““Pesë fëmijë na vdiqën në një ditë. U nisën 9 veta dhe në Vlorë erdhën 4 veta” tha ajo.
Në ceremoni foli edhe një e re nga Kosova, e cila bëri thirrje që viktimat e gjenocidit të mos kujtohen vetëm një ditë në vit.
“Unë jam Arta, vij nga Kosova. Jam çame. Mbaj emrin e Artës së Ccamërisë. Vij në përkujtim të viktimave dhe sjell një mesazh nga Kosova. Ne kuptojmë dhimbjen e njëri tjetrit. Apeloj tek të gjithë që mos të ndahemi dhe mos t’i harrojmë viktimat” tha ajo.
Në prononcimin për mediat, kryetari i PDIU-së, Shpëtim Idrizi, u ndal tek përpjekjet për ndërkombëtarizimin e çështjes çame dhe roli që, sipas tij, duhet të ketë shteti shqiptar në mbrojtjen e të drejtave të shqiptarëve të Çamërisë.
“Dosja diplomatike është e plotë. Ne do shtyjmë fort që shteti shqiptar t’i japë zgjidhje ccështjes së Ccamërisë. Ne kemi 82 vjet që kujtojmë këta martirë. Kemi bërë shumë gurë kilometrikë në zgjidhjen e kësaj ccështje. Këto varreza janë kujtesa historike për atë që ka ndodhur” tha ai
Ndërsa kryetari i nderit i PDIU-së, Tahir Muhedini, kërkoi që në Çamëri të ngrihet një memorial për viktimat, në mënyrë që familjarët të kenë mundësi të nderojnë të afërmit e tyre edhe në trojet prej nga u dëbuan. Ceremonia përfundoi me vendosjen e kurorave dhe luleve pranë Memorialit të Viktimave të Gjenocidit.
Edhe pas 82 vitesh, Kllogjeri mbetet vendi ku çdo 27 qershor rikthehen kujtimet e një prej kapitujve më të dhimbshëm të historisë së shqiptarëve të Çamërisë, ndërsa kërkesa për drejtësi dhe ruajtjen e kujtesës historike vijon të përcillet brez pas brezi.
Ish-deputeti Dashamir Tahiri sulmon kreun e PDIU-së në përkujtimin e 82-vjetorit të gjenocidit çam: Po tentojnë të vjedhin aktivitetin
Edhe ky 82-vjetor i përkujtimit të gjenocidit grek ndaj shqiptarëve të Çamërisë, nuk i ka shpëtuar përplasjeve politike.
Ish-deputeti dhe një nga figurat e para politike të komunitetit çam, Dashamir Tahiri ka reaguar ashpër ndaj asaj ai e konsideruar si tentativë për vjedhjen e aktiviteteve në përkujtim të viktimave të genocidit grek ndaj popullatës çame nga “ustallarët” pseudo-çamë.
“Ky është viti i dytë që e bën bashkia, ka shoqata e Vlorës, ka të tjerë. Ka pastaj nga këta ustallarët që tentojnë ta vjedhin aktivitetin që të duket se bëjnë këta. Kauza dhe çështja çame nuk është për maskarenj. Zgjidhja do t’i vijë kur Shqipëria të hyjë në Evropë. Përrallat e këtyre e trimave, ja lemë kohës. E kanë vendin të koshi i maskarenjve të historisë”, është shprehur Dashamir Tahiri, duke shigjetuar kryetarin aktual të PDIU Shpëtim Idrizi.
Dashamir Tahiri prej vitesh ka mbajtur qëndrime kritike për drejtimin e partisë nga Shpëtim Idrizi, duke e akuzuar se po mbanë peng edhe Shoqatën Patriotike Çamëria. Dashamir Tahiri ka qenë një prej themeluesve të Partisë për Drejtësi dhe Integrim dhe deputeti i parë i kësaj force politike në zgjedhjet e 2013 e cila drejtohej nga Tahir Muhedini.
Më pas kësaj force politike iu bashkua edhe Shpëtim Idrizi, i cili kishte dalë si deputet nga Partia Socialiste. Përplasjes mes Shpëtim Idrizit dhe Tahir Muhedinit, çuan në krijimin e një force politike të re: Partia për Drejtësi dhe Unitet PDU, kryetar i së cilës u zgjodh Shpëtim Idrizi. Dy forcat politike u bashkuan më pas në Partinë për Drejtësi Unitet dhe Integrim PDIU, parti e cila vazhdon të drejtohet nga Shpëtim Idrizi.
