Një video virale me pamje të rënda që po qarkullon në rrjetet sociale ku një vajzë e mitur shfaqet duke u dhunuar fizikisht nga dy vajza ndërsa një tjetër filmon të gjithë skenën pa ndërhyrë, ka tronditur mbarë opinionin publik. Pamjet tregojnë se viktima goditet në mënyrë të përsëritur me shuplaka e grushte dhe tërhiqet zvarrë prej flokësh.
Dy 15-vjeçaret që kanë dhunuar 17-vjeçaren, ishin në shtëpinë e Leonela Lamajt, 19 vjeçe.
Ngjarja është raportuar në Policinë e Fierit, menjëherë pas kallëzimit të 17-vjeçares së dhunuar në datën 8 qershor. Në polici, të tria kanë deklaruar se e kanë rrahur të miturën për motive të dobëta dhe ndaj tyre ka nisur një hetim.
Më 28 qershor, është arrestuar njëra prej 15-vjeçareve të përfshira. Arrestimi u bë pas kallëzimit të nënës , e cila deklaroi se ishte dhunuar prej së bijës. 15-vjeçarja është dërguar për trajtim në spitalin psikiatrik në Tiranë.
Sipas burimeve, paraditen e sotme, drejtuesi i Policisë Fier, Erion Ahmetaj, është parë për më shumë se një orë në ambientet e Prokurorisë, ku mësohet se fokusi i takimit me kryeprokurorin Elion Mustafaj, ka qenë pikërisht zbardhja e plotë e rrethanave të kësaj ngjarjeje dhe përcaktimi i përgjegjësive ligjore.
Njoftimi:
Nisur nga sensibiliteti i lartë publik i krijuar pas publikimit në rrjetet sociale të videos së një ngjarjeje të ndodhur më datë 08.06.2026, si dhe pas reagimeve dhe interesit të madh të qytetarëve në drejtim të adresave zyrtare dhe rrjetet sociale të Policisë së Shtetit, Drejtoria Vendore e Policisë Fier e konsideron të nevojshme të risqarojë opinionin publik mbi masat e marra dhe veprimet e kryera nga strukturat e Policisë në lidhje me këtë rast, dhe më konkretisht:
Më datë 08.06.2026, një shtetase 17 vjeçe është paraqitur në Komisariatin e Policisë Fier, së bashku me nënën e saj, dhe ka kallëzuar se ishte dhunuar dhe filmuar në banesën e shtetases L. L., 19 vjeçe, nga kjo e fundit dhe dy shtetase të tjera 15-vjeçare.
Menjëherë pas kallëzimit të së miturës, strukturat e Drejtorisë Vendore të Policisë Fier kanë vlerësuar maksimalisht denoncimin dhe, në bashkëpunim me Prokurorinë, kanë kryer të gjitha veprimet procedurale dhe hetimore, në përputhje me parashikimet ligjore.
Në vijim të veprimeve hetimore, janë shoqëruar në ambientet e Komisariatit të Policisë shtetasja L. L., 19 vjeçe, si dhe 2 shtetaset e mitura 15-vjeçare, të cilat deklaruan se kishin ushtruar dhunë ndaj shoqes së tyre, shtetases së mitur 17 vjeçe, për motive të dobëta.
Në përfundim të veprimeve, më datë 09.06.2026, materialet procedurale i’u referuan Prokurorisë për veprën penale “Dëmtime të tjera me dashje”, në ngarkim të 3 shtetaseve të mësipërme.
Gjithashtu, sqarojmë se, më datë 28.06.2026, nga specialistët për Hetimin e Krimeve, në koordinim me Prokurorinë e Juridiksionit të Përgjithshëm Fier, është arrestuar njëra nga 15-vjeçaret e përfshira në dhunimin e 17-vjeçares. Arrestimi u bë pas kallëzimit të nënës së 15-vjeçares, e cila deklaroi se ishte dhunuar nga vajza e saj, duke i shkaktuar dëmtime fizike.
Pas procedurave përkatëse dhe bazuar në vlerësimin e autoriteteve kompetente, 15-vjeçarja e arrestuar është dërguar për trajtim në një institucion shëndetësor të specializuar për shëndetin mendor, në Tiranë.
Drejtoria Vendore e Policisë Fier rithekson se ka kryer të gjitha veprimet e nevojshme hetimore në përputhje me ligjin, në bashkëpunim të ngushtë me organin e Prokurorisë, i cili është autoriteti kompetent për vijimin e procedimit penal.
Policia e Shtetit mbetet maksimalisht e angazhuar për trajtimin me seriozitet të çdo rasti që cenon sigurinë e qytetarëve, veçanërisht kur në këto ngjarje përfshihen të mitur, duke vepruar me profesionalizëm, paanshmëri dhe në zbatim të plotë të ligjit.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.
Fier/ Fqinja e së miturës së dhunuar nga 3 vajzat: Jemi të tronditur, e kemi rritur vetë! Është e traumatizuar, s’ka dijeni për videon virale
Fqinja e së miturës së dhunuar nga 3 vajza në Fier, shprehet për Report TV se ngjarja tronditëse e ka shokuar. 17-vjeçarja shkonte shpesh në shtëpinë e Lavdie Çepeles, e cila rrëfen detaje nga 8 qershori, dita kur e mitura shkoi në shtëpi me shenja dhune.
“U prekëm shumë. Unë e kam rritur atë. Ky muhabet ka që në datën 8, mbush muajin nesër. Erdhi çupa e dhunuar, por nuk tregoi gjë për momentin. Ishte në kurs, doli nga kursi, dolën shoqet përpara, e rrahën. Erdhi në shtëpi me blana, e pyeti e ëma, tha isha sëmurë, bëra serum, u godita, nuk tregoi. Iu kundërvu e ëma, pasdite vonë tregoi. Mori çupën dhe bëri denoncimin në polici. Nga data 8 asnjë përgjigje s’ka marrë tha, i thoshin e ka prokuroria rastin”, tha Çepele.
Dhuna e bëri vajzën të pësonte shenja të forta stresi nga trauma e kësaj ngjarjeje duke reaguar ndaj çdo zhurme. Fqinja thotë se 17-vjeçarja është vajza e madhe nga tre fëmijët e familjes. Nuk i njihte vajzat që e dhunuan, përveç njërës që e kishte në shkollë.
“Më thanë hajde se kemi një sqarim”, citon Çepele fjalët e së miturës dhe më pas “e morën në shtëpi dhe e rrahën”, shton ajo.
Pamjet e dhunës së 17-vjeçares janë bërë virale, por ajo nuk është në dijeni të këtij fakti.
